Immap assingi aatsaat 2026-mi piariissasut
Naalagaaffiup Geodatastyrelsemik Aalborgimut 2016-imi nutsertitsinerata kinguneranik sulisut qaffasissumik immikkut ilinniagaqarsimasut arlalissuit soraarput. Tamanna ilaatigut Kalaallit Nunaanni immap assinginik eqquivoq, taakkualu isumaqatigiissutaaqqaarsimasumut sanilliullugit maanna ukiunik arfineq-pingasunik kinguaattoorsimalerlutik.
2009-mi taamani Danmarkimi avatangiisinut ministeriusoq Troels Lund Poulsen (V) Namminersorlutik Oqartussanut isumaqatigiissusiorpoq, Kitaata kujasissuata imartaanut immap assinginik nutaanik 2018 naatinnagu suliarinnittoqassasoq. Immap assitoqaanik digitaleriseerineq immallu assinginik nutaanik atuutilersineq Kalaallit Nunaanni imaatigut angallannermi isumannaallisaanermut sinaakkutinik pitsanngoriartitsisussaasimagaluarpoq, immap assinginik elektroniskiusunik, Kalaallit Nunaata imartaani GPS-imut atatillugu toqqaannartumik atorneqarsinnaasunik, siusinnerusukkut soqarsimanngimmat. Immap assingi elektroniskiusut taakkua suliarinninnissamut pilersaarut isumaqatigiissutaasoq naapertorlugu immap assingisa pappiaraasut peqatigisaannik pilersinneqartussaasimagaluarput.
Naalagaaffiullu suliffissanik 2016-imi nuussinerata kingunerisaanik immap assingi kinguaattoorpoq, nutsertitsisoqarneranilu Geodatastyrelsimi sulisut immikkut qaffasissumik ilinniagaqarsimasunit 96-init 55-it Københavnimit Aalborgimut nuunnissamut qujaannarlutik. Kinguaattoorneq aallaqqaammut ukiunik arfinilinnik sivisussuseqarpoq. Maannali tamanna ukiunik arfineq-pingasunik sivisussuseqartussatut isikkoqalerpoq. Tamanna silap pissusianut, nukissiuuteqarnermut pilersuinermullu ministerip Dan Jørgensenip (S) Enhedslisten sinnerlugu Folketingimut ilaasortamut, Christian Juhlimut, akissutaani atuarneqarsinnaavoq.
– Geodatastyrelsip 2016-17-imi nuunneqarneranik suliap kinguneranik Kalaallit Nunaannut immap assinginik suliaqarnerup attatiinnarnissaa ajornarsimavoq. Taamaammat immap assinginik nutaanik 2017-imi saqqummersitsisoqanngilaq. Immap assinginik suliaqarneq 2018-imi nangeqqinneqarpoq, maannamullu 2018-imi aamma 2019- imi immap assinginik nutaanik marlunnik pingasunik suliaqartoqarsimavoq. Geodatastyrelsip 2020-mi immap assinginik nutaanik sisamanik suliaqarnissaq naatsorsuutigaa. 2020-p aallartinnerani sumiiffimmut immap assinginit isumaqatigiissutaasunit 73-init 37-t suliarineqarsimapput. Namminersorlutik Oqartussanut isumaqatigiissut nutaat naapertorlugu immap assinginik suliaqarnerup 2026-mi naammassinissaa naatsorsuutigineqarpoq, akissummi oqaatigineqarpoq.