Immanuelsen: Qaleralinnut tunngatillugit aaqqiissutissarsiorpugut
Qeqertarsuup Tunuani sineriammut qanittumi qaleralinniarsinnaasut qaleralittassiissutinut sanilliugit amerlavallaarput, ajornartorsiullu tamanna aaqqiiffigineqassaaq, Aalisarnermut, Piniarnermut Nunalerinermullu Naalakkersuisoq oqarpoq.
IA’s Aqqaluaq B. Egede IA-meersoq sapaatip akunnerani matumani Aalisarnermut, Piniarnermut Nunalerinermullu Naalakkersuisumut Jens Immanuelsenimut sakkortuumik isornartorsiuivoq.
Aqqaluaq B. Egedep oktobarip qaammataanut pisassiissutit nungummata sineriammut qanittumi qaleralinniarnermik naalakkersuisup unitsitsisimannginnera akisussaassuseqannginnerarpaa.
Aalajangiineq pissutaalluni ukiup sinneranut pisassiissutit sinnerlugit pisarineqarsimapput.
Jens Immanuelsen tusagassiortunut nalunaaruteqarnermi imatut oqarpoq:
Aaqqiissutissarsiorluni sulisoqartoq
- Maannakkut qaleralinniarnermi pissutsit avaqqunneqarsinnaanngitsut tassaapput, qaleralinniarsinnaasut qaleralittassiissutigineqartunut sanilliullugit aalisarsinnaassusermut annertuallaarmat. Taama aaqqissuussisimaneq allanngortinneqanngippat taama pisoqartuassaaq.
- Naalakkersuisoqarfimmi aaqqiissutissanik maannakkut suliaqarpugut. Qeqertarsuup Tunuani qaleralinniarnerup piaartumik aallarteqqinnissaa salliutillugulu pingaartinneqarpoq. Taannaavorlu aaqqiissutissarsiorlugu massakkut suliara, Jens Immanuelsen oqarpoq.
Tusagassiorfinnut nalunaarummi allassimanngilaq, aalisarnerup unitsinneqarnerani pisassiissutillu ukiup naanissaanut qaammatit marluinnanngortut nungussimanerat eqqarsaatigalugit Jens Immanuelsen qanoq iliuuseqarniarnersoq.
Sermistsiaq.AG-mi Jens Immanuelsen pisassiissutigineqarsimasut tamakkerneqarmata aalisarnermik unitsitsiniarani aalajangersimanera pillugu apersorusunneqarsimagaluarpoq. Tamannali suli iluatsinneqanngilaq.