Immanuelsen: KNAPK suleqatigiissitamut peqataajunnaarami?
KNAPK-p siulittaasuata Henrik Sandgreenip ippassaq sioorasaarutigaa, sineriammut qanittumi aalisartunut ikiorsiissutit ukioq manna atuutseqqinneqalinngippata aalisartut suliumajunnaassasut. Taamatut nalunaaruteqarnera Aalisarnermut Naalakkersuisup Jens Immanuelsenip tupigusuutigaa, naalakkersuisup KNAPK ikiorsiissutissat nutaat pillugit suleqatigiissitamut peqataaqqusimammagu
Aalisarnermut Naalakkersuisoqarfiup aamma Aningaasaqarnermut Naalakkersuisoqarfiup ukiortaaq sioqqutitsiarlugu suleqatigiissitaq ”corona pissutigalugu aalisarnerup pitsaasumik aningaasarsiorfigiunnaarnerata kingunerisaanik ikiorsiissutinik pisariaqartitsinermik” misissuisussaq pilerseqqissimavaat.
Aalisarnermut Naalakkersuisup Jens Immanuelsenip nassuiaatigaa, suleqatigiissitap ikiorsiissutit qanoq amerlatigisut 2020-mi 2021-milu pisariaqartinneqassanersut misissortussaagai. KNAPK-lu nalunaaruteqarsimasoq misissuinermut peqataassalluni.
Aamma atuaruk: KNAPK suliumajunnaartoqarnissaanik aarlerisaarisoq
- Tamannalu Naalakkersuisunit naatsorsuutigivarput attatiinnarneqartoq, taamaammallu suleqatigiissitami nalilersuinerit peqataaffigissagaat. KNAPK allatut isummersimassappat, tamanna pillugu ilisimatinneqarsimanngilagut, Jens Immanuelsen Henrik Sandgreenip suliumajunnaarotqarnissaanik aarlerisaarutaa KNR-kkut marlunngormat saqqummiunneqarneranut atatillugu oqarpoq.