Immanuelsen tunuarusunngilaq
Aalisarnermut Naalakkersuisup Jens Immanuelsenip Kukkunersiuinermut Ataatsimiititaliap aalisarnermut naalakkersuisoqarfiup aqutsineranik annertusisamik misissuinermut atatillugu oqaaseqataa sakkortooq pissutigalugu Partii Naleqqap tunuarnissaminik piumasaqaataa itigartippaa.
- Naalakkersuisutut tunuarnissannut tunngavissaqanngilaq, Jens Immanuelsen Sermitsiaq.AG-mut oqarpoq, imalu nassuiaateqarluni:
- Kukkunersiuinermut Ataatsimiititaliap oqaaseqaataa januaarip 22-ani 2021-meersoq aqutsinermik misissuineq pillugu, naalakkersuisoqarfiup akissuteqarluni allakkiaanut tunngasuuvoq, tasssanimi naalakkersuisoqarfik oqaaseqaatinik aqutsinermillu annertusisamik misissuinerup inassuteqaataasa piviusunngortinnissaannut piffissaliussanik saqqummiussaqarpoq.
Aqutsisut nukittorsarneqartut
Jens Immanuelsenip itigartitsinini tunngavilersorlugu oqaatigaa, naalakkersuisoqarfiup pisortaata Jørgen Isak Olsenip aqutsisut novembarimi 2019-imi nukittorsaavigisimagai immikkoortortaqarfimmut pisortamik nutaamik kiisalu siunnersortit pisortaannik ikiuuttussamik atorfinitsitsinikkut aqutsinermut akisussaaffiup agguataarnissaata kivinnissaatalu kiisalu aalisarnermut immikkoortortaqarfimmi sulinermut isiginneriaatsimik nutaamik qulakkeerinninnissaq anguniarlugit.
- Aalajangiineq tamanna pisimavoq, suliamik ingerlatseriaatsip allanngortinneqarnissaa nukittunerusorlu pisariaqartinneqartut nassuerutigalugit. Taamaalillutik aqutsisut nutaat atorfinitsinneqarput immikkut pingasunik pitsanngorsaasoqarnissaa piumasaralugu: Suleriaatsini tamani ilitsersuutit, aningaasarsiutigalugu aalisarneqarsinnaasunut tamanut aqutsinermut pilersaarutit kiisalu immikkoortortaqarfimmi piginnaasat qulakkeerniarlugit ilorrisimaarnermik pitsanngorsaanissaq, Jens Immanuelsen paasissutissiivoq, erseqqissaallunilu, Deloittep nalunaarusiani uparuarneqartut amerlanersaat oktobarimi 2020-mi ingerlaannaq pitsanngorsaavigineqareersimasut.
Jens Immanuelsen paasissutissiivoq, immikkoortortaqarfimmi ilitsersuutini aaqqitassat amigaataasut Deloittemit inassutigineqartut aallaagivalugit maanna suliarineqalersut.
2019-imi aallartippugut
- Suliarujussuaq suli ingerlanneqartoq tassa 2019-imi aallartinneqarpoq angusaqarfiusorujussuusimmallunilu. Avataasiornermi ilinniartitaanermilu ilitsersuutit inissinneqarsimapput sinerissallu qanittuani aalisarnermik aqutsinermi ilitsersuutinik suliaqarneq aallartinneqarsimalluni. Tamatuma saniatigut aqutsinermik pilersaarutinik suliaqarnermi najoqqutassanik suliaqartoqarsimavoq, aqutsinermut pilersaarutinik nutaamik sisamanik kinguneqareersimasunik kiisalu marluk suliarineqarlutik, Jens Immanuelsen paasissutissiivoq.
Jens Immanuelsenip Delottep misissuinerata sulianik ingerlatsinermi kukkusoqarsimaneranik takutitsisimanera miserratigerusunngilaa.
- Tamannalu soorunami ajuusaarutigaara, kisianni aamma erseqqissaatigerusuppara misissugassanik taamungaannaq tigusisarnikkut kukkunernik nassaartoqartarsimanera, immikkoortortaqarfimmi sulianik ingerlatsinermut nalinginnaasumut sinniisuusariaqanngitsunik, isumaqarpoq.
Erseqqissaalluni oqarpoq, allaffeqarfik aqutsiveqarfimmut angisoorujussuarmut Kalaallit Nunaanni inuussutissarsiutit annersaannut tunngasumut sanilliullugu sulisukitsuararsuusoq.
Aalisarnermut immikkoortortaqarfik atorfiit inuttaqanngitsut pissutigalugit ukiuni arlalinni unammilligassaqarsimavoq. Ullumikkut inuit aqqaneq-marluk aalisarnermik aqutsinermi suliassanik tamarmiusumik isumaginnittussatut atorfeqarput.
Politikkikkut pisariusoq
- Aalisarnermut immikkoortortaqarfimmi ingerlatsinikkut suliassat soorunami pingaarnersiuinermi salliutinneqassapput, kisianni tamatumunnga atatillugu oqaatigineqassaaq, akisussaaffeqarfik politikkikkut ima pisariutigimmat, sulinermi piffissap ilarujussua politikkimut tunngasut kiffartuunnissaannik pisariaqartitsinerup matussuserneqarnissaanut atorneqartarluni, ingerlatsinermilu suliassat tunngaviusut utaqqisinneqartariaqartarlutik imaluunniit tuaviuunneqartariaqartarlutik, Jens Immanuelsen oqarpoq.
Erseqqissaalluni oqarpoq, allaffeqarfimmi sulisukitsumi sulisut ataasiakkaat sulinngikkaangata mianernartorujussuarmik inissisimasoqartartoq, taamaammallu immikkoortortaqarfimmi ilorrisimaarnerup pitsanngorsaaviginissaa pingaaruteqarsimasoq, piginnaasanik annaasaqartoqaqqunagu. Taamaalillutik sulisut ullumikkut aqqaneq-marlunnik amerlassuseqarput.
Jens Immanuelsen isumaqarpoq, isumalluutinik amerlanerusunik pigisaqalernissaq pisariaqanngitsoq.
- Aalisarnermut immikkoortortaqarfiup suliassai sinaakkutit pigineqartut iluanni pingaarnersiorneqarlutillu suliarineqartarput, oqarpoq.