Immanuelsen aalisarneq pillugu inatsimmi nutaami tunngavissamik pingaarutilimmik itigartitsisoq

Aalisarnermut Naalakkersuisup Jens Immanuelsenip Aalisarneq pillugu Ataatsimiititaliarsuup aalisarneq pillugu nutaamik inatsisiliornermini tunngavissiaa pingaarutilik itigartippaa.

Aalisarneq pillugu Ataatsimiititaliarsuup sapaatip akunnerani kingullermi ilisimatitsissutigaa, nungusaataanngitsumik aalisarnissaq aamma aalisartut ataasiakkaat aningaasaqarnerisa imminnut ataqatigiinnissaat qulakkeerniarlugit aalisarneq pillugu inatsisissap nutaap ingerlatsinissamik pilersaaruteqarluni suliarineqarnissaa pingaaruteqartoq. Allatut oqaatigalugu: Aalisarneq pillugu Ataatsimiititaliarsuup suliaqarnissaanut piumasaqaataavoq, akuliutinnginnissamik tunngaveqarnerup atuutsinneqalernissaa, politikkerit immikkut pisassiissuteqaqqissinnaajunnaarlugit.

Jens Immanuelsenip KNR-imut ilisimatitsissutigaa, politikkerit namminneq aalajangertassagaat aalisarnermi qanoq pisassiisoqartassanersoq.

Akornutaasoq

Aalisarnerup iluani politikkikkut akisussaanerpaasup nalunaarutaa taamaalilluni Aalisarneq pillugu Ataatsimiititaliarsuup sulinermini pingaarnertut tunngavianut akornutaavoq, apeqqutaalerporlu oqaatsit kusanartorsuit, soorlu ”piujuartitsineq”, ”sinaakkutit patajaattut”, ”atugarissaarneruneq” aamma ”piffissaq ungasinnerusoq eqqarsaatigalugu inuiaqatigiit aningaasaqarnerannut iluaqutaasussat” piviusunngortinneqarsinnaanersut, tamakkumi Aalisarneq pillugu Ataatsimiititaliarsuup suliaqarnissaanut siunertaajuarsimammata.

Jens Immanuelsenilli Aalisarneq pillugu Ataatsimiititaliarsuup oqallissaarutaa atuarluarsimarpasinngilaa.

KNR-mummi imatut oqarpoq:

- Biologit misissuisimanertik tunngavigalugu ukiumut tamarmut pisassiissutissanik siunnersuuteqartarput. Taakkuli pisassiissutit qanoq annertutigissanersut aalajangertussaanngilaat. Naalakkersuisut aalajangertussaavaat.

Amerlanerit aalajangeeqataasalernissaat

Aalisarneq pillugu Ataatsimiititaliarsuup isumaqatigiittup oqallissaarutaani allassimavoq, aqutsinissamut pilersaarutit ineriartortinneqassasut – biologiinnarniunngitsoq - aammali ”TAC-mik aalajangersaanermut atatillugu atuisunit sutigullu tamatigut aqutsisunit”.

- TAC, pisarineqarsinnaasut nikerartarnerat eqqarsaatigalugu biologit patajaallisaasumik siunnersuisarnerannik tunngavilik. Tassa aqutsinissamut pilersaarusiornermut atatillugu naalakkersuinikkut akuleruttoqannginnaasaanut tunngavik atorneqartassaaq, Aalisarneq pillugu Ataatsimiititaliarsuup oqallissaarutaani taamatut allassimasoqarpoq.

Tassunga atatillugu aamma oqaatigineqaroq, najoqqutassat ilisimatuut, atuisut aqutsisullu suleqatigiinnerannik nukittorsaasussat qulakkeerisussallu ineriartorteqqinneqarnissaat pisariaqartoq.

Powered by Labrador CMS