Skip to main content

Immanuelsen aalisarfiit pisassiissutitaqanngitsut atorunnaarsinneqarnissaannut isumalluartoq

Naalakkersuisut ukiuni arlaqartuni sulissutigisimavaat, pisassiissutitaqanngitsumik aalisarfiusartut, tassa killeqanngitsumik qaleralinniarfiusartut atorunnaarsinneqarnissaat. Naalakkersuisup maanna neriuutigaa, Demokraatit naalakkersuisooqataalernerisigut tamanna kiisami iluatsinneqassasoq.

Aalisarnermut, Piniarnermut Nunalerinermullu Naalakkersuisoq Jens Immanuelsen nammineq aalajangiisinnaasuuguni, pisassiissutitaqanngitsumik qanorsuaq qaleralinniartarfiusartut atorunnaarsinneqariaannaagaluarput:

- Soorunami neriuutigaara tamanna naammassineqassasoq. Tusarniaaneq naammassineqareerpoq, tusarniaanermullu akissutit suliarineqarnerat naammassineqarpat, tamanna saqqummiutissavara. Killeqanngitsumik aalisarfiusartut atorunnaarsinneqarnissaat sulissutigaarput, Jens Immanuelsen Sermitsiaq.AG-mut oqarpoq.

Jens Immanuelsenip tassunga atatillugu innersuussutigaa, sineriammut qanittumi qaleralinniartarneq pillugu nalunaarut nutaaq naalakkersuisunit suliarineqarsimasoq aggustimi tusarniaassutigineqarsimasoq.

Naalakkersuisut nalunaarut akuersaarpassuk naammassillugulu suliarippassuk, Aasianniit Nunap Isua tikillugu aqutsiveqarfiit nutaat pilersinneqassapput.

Demokraatit naalakkersuisooqataalernerisigut naammassineqassasoq

Naalakkersuisut nalunaarut tassunga assingusoq siorna tusarniaassutigisimavaat, taamanikut nalunaarutigineqarpoq susassaqarfik akerlerineqaqisoq atorunnaarsinneqalersoq, taamanikkulli susoqarsimanngilaq.

Tamatumuuna naammassineqarnissaanut suup taamatut isumaqalersippaatit?

- Siorna suliarineqartumut peqataasimavunga. Taamanikkut aalajangiunneqarpoq, aalisarneq pillugu ataatsimiititaliarsuup suliai utaqqimaarneqassasut. Nalunaarummik maanna saqqummiussinitsinnut tunngaviuvoq, naalakkersuisooqatigiinnissamut isumaqatigiissummi, maanna Demokraatinit peqataaffigineqartumi anguniagatsinnik naammassinnikkusunnerput, Jens Immanuelsen oqarpoq.

MSC-mik allagartalertinnissaq anguniarneqartoq

Pisassiissutitaqanngitsumik aalisarfiusunik atorunnaarsitsiniarneq, sineriammut qanittumi qaleralinniartarnerup piffissaq ungasinnerusoq eqqarsaatigalugu MSC-mik allagartaqalersinneqarnissaanik suliaqarnitsinnut ilaavoq, naalakkersuisoq oqaluttuarpoq; 

- Inuiaqatigiinnit piumasaqaataavoq qaleralinniartarnerup nakkutigineqarnissaa. Eqqaamanerlunngikkukku 2018-imi killeqanngitsumik aalisarfiusartuni 4000 tonsit pisarineqarsimapput. Pissutsit taamatut ingerlalersimappata nalilersuisoqartariaqarpoq. Anguniarneqartoq aamma tassaavoq, sineriammut qanittumi qaleralinniartarnerup MSC-mik allagartalersinneqarnissaa, tamannalu pitinnagu aaqqissuusseqqittoqartariaqarpoq, Jens Immanuelsen oqarpoq.

Naalakkersuisut kitaata sineriaani aqutsiveqarfinnik nutaanik pilersitsissappata, assersuutigalugu Nuup eqqaani qaleralinniartarneq siunissami aamma pisassiissutitaqalissaaq.

Pinngortitaleriffimmit Nuup eqqaani aqunneqanngitsumik aalisartoqartarneratigut qaleraleqassuseq siusinnerusukkut ernummatigineqartarsimavoq.

Jens Immanuelsen naapertorlugu, Naalakkersuisunit anguniarneqarpoq nalunaarutip nutaap ukiortaamiit atuutsinneqalernissaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER