Kitaa silarluppoq
'Immanuel' utoqqatserpoq: Kukkusoqarneratigut angallassisoqarpoq
'Immanuel'-imi siulersuisuni siulittaasuata Hans Sivertsenip silarluttumi meeqqanik angallassisoqarsimanera utoqqatsissutigaa
- Eqqarsaatigilluaraanni paasisinnaavarput umiatsiamik silarlutsillugu meeqqanik angallassineq eqqarsaat pitsaasuunngilaq, taamaattumik taamaasiortoqarnera utoqqatsissutigaarput. Pisoq illersorneqarsinnaanngilaq.
Angallataatileqatigiiffiup namminersortup ''Immanuel'-ip siulersuisuani siulittaasoq Hans Sivertsen oqarpoq.
Angallat 'Immanuel' 40 fodseqarpoq Jupiteriusoq, Nuummit Qoornuliarpoq Atuarfik Samuel Kleinschmidtimi atuartut aallaarsimaartut aallugit sisamanngornerup ullaani. 25-nik ilaasoqarluni Nuummukarpoq, anorlerlunilu siallernera pissutaalluni nunamut angummannaveeraluarput. Angallatip nunamut tulanniarsarinera angajoqqaasunit ilaqutaasuniillu isiginnaarneqarpoq.
Isumannaatsuua?
Hans Sivertsenip oqaatigaa angallammi aquttuusup aalajangertaraa angalaneq isumannaatsuunersoq.
- Angalasimanersi isornartorsiorneqarnera paasisinnaaviuk?
- Aap paasisinnaavara. Kukkusoqarneratigut angallassisoqarpoq, Hans Sivertsenip apeqqut akivaa.
Atuarfik Samuel Kleinschmidtimeersut 'Immanuel'ip tikiutereermagit umiatsiamut ajornartorsiortumut ikiuiartorluni aallaqqippoq, Hans Sivertsen ilisimatitsivoq.
Atuartut angallammi ilaasut, ilinniartitsisut, angajoqqaajusut ilaqutaasullu Atuarfik Samuel Kleinschmidtimi tallimanngornermi pisoq pillugu oqaloqatigiinnikkut ikiuigasuartoqarpoq.