atassuteqaat

Immakkut attaveqqaat avannamut ilaneqalerpoq

Immakkut kabeli Nuummiit Aasiannut ilaneqarnissaa, aammalu sakkortusaavimmik annertuumik pisinnaasalimmik Ilulissat tikillugu ikkussisoqassasoq, Tele-Postimi siulersuisut aalajangiuteqqammerpaat

Nunatta avannarpasinnerusortaanut nutaarsiassatsialaqarpoq, tassami Tele-Postimi siulersuisut aalajangiuteqqammerpaat attaveqaateqarnermut pitsanngorsaataasussamik immakkut attaveqaammik pilersitsinissaq aallartinniarlugu.

Immakkut attaveqaatip Nuummiit Maniitsoq Sisimiullu aqqusaarlugit Aasiaat tikillugit tallineqassarnissaa pilersaarutaavoq, Tele-Post tusagassiuutinut nalunaarummi allappoq.

Atuaruk: Imaatigut kabeli pillugu aalajangiinissaq kinguarteqqinneqartoq

Sakkortusaavik annertuumik pisinnaasalik
- Iluliarsuit immallu naqqata pissusaa peqqutaallutik immakkut attaveqaat avannarpasinnerusumut ingerlateqqinneqarsinnaanngilaq. Tassungali taarsiullu sakkortusaavimmik annertuumik pisinnaasalimmik Aasianniit Qasigiannguanut Ilulissanullu attaveqartussamik pilersitsisoqassaaq, Tele-Post allappoq.

Aammattaaq maannakkut sakkortusaaviup pioreersup Uummannamiit Upernaviup tungaanut tallineqarnissaa pilersaarutaavoq.

Atuaruk: Ole Dorph: Immap naqqatigut kabelilerneqassaagut

Akuerineqaqqaassasoq
Suliassalli aallartinnginnerini aalajangiinerup nassataanik inissitassat kingulliit naammasseqqaagassaapput.

- Aalajangiinernut taamatut ittunut pitsaasumik aningaasaliissuteqartoqarnissaa pisariaqarpoq. Uagullu periarfissaqarluarneralu naatsorsuutigilluinnarparput. Aningaasaliinissamulli piumasaqaatit piginnittutsinnit aamma akuerineqaqqaartussaapput. Siulersuisulli tamatuma ajornartorsiutitaqarnissaa ilimaginngilaat, Tele-Postimi siulersuisuni siulittaasoq, Stine Bosse oqarpoq.

Aningaasaliissutit amerlanerit annertunerillu
Immakkut attaveqaat Tele-Postip annertuumik aningaasaliiffigisaani kisiartaanngilaq. Ukiuni tulliuttuni ingerlatsivik ilaatigut mobileqarnikkut aammalu immakkut attaveqaatinut atortunik aserfallatsaaliinernut annertuunik aningaasaliissuteqartussaavoq.

- Massakkorpiaq ikaarsaariarfiup nalaaniippugut. Aningaasaliissutiginiakkat piviusunngussappata ingerlatsivik naleqqussartariaqarparput ingerlaavartumillu pisariillisaalluta. Suliaq aallartereerpoq ukiunilu tulliuttuni ingerlassaaq, Stine Bosse oqaluttuarpoq.

Innuttaasut pingajorarterutaannut pingaaruteqarpoq
Suliaq tamakkiisoq innuttaasut 20.000-t oqarasuaateqarnikkut attaveqaateqarnerinut pitsanngorsaataassaaq, aningaasaliissuteqarnerullu inuiaqatigiinnut tamakkiisumik iluaqutaasussaanera qularutissaanngilaq.

- Nunap ineriartortinneqarnerani oqarasuaateqarnikkut attaveqaatit qularnaatsut patajaatsullu soorunami qitiulluinnarput. Ilinniartitaaneq, peqqissuseq, minnerunngitsumillu inuussutissarsiornerup ineriartornera, suliffeqarfinnillu namminersortunik pigineqartunik pilersitsiffiusinnaanera eqqarsaatigigaanni, inuiaqatigiit siumut alloriarujussuassapput. Ineriartornermilu tassani pitsaasumik suleqataanissarput qilanaaraarput.

Suliassalli aallartinnginnerini aalajangiinerup nassataanik inissitassat kingulliit naammasseqqaagassaapput.

Atuaruk: Narsami imaatigut kabelimik politikeri pitaarusuttoq

Powered by Labrador CMS