Imigassartortarnermut pinaveersaartitsinerit iluatsissimanngillat
Nuummi nakorsiartarfimmi nakorsaanerup aningaasarsisoqarnerani ernguterujussuartoqartarnera nukillalaarnarivaa. Ernguterujussuarnernimi ajoqusernerit nakorsiartarfimmi suliaqarnerulersitsisarput. Ajortumut ingerlavugut, imigassaq ikiaroornartullu pillugit siunnersuisoqatigiit siulittaasuat oqarpoq.
Qaammammusilluni aningaasarsisoqareernerani sapaatip akunnerata naanerani imigassartortoqareersimanerata kinguneranik suliarineqartariaqalersimasut 30-init amerlanerusut Nuummi nakorsiartarfimmi suliarineqartariaqarsimapput.
Aviisi AG taama allappoq.
- Nukillalaarnarivagut. Pissutaasut ilagivaat peqqinnissaqarfimmi nukiit pigisagut annertoorujussuarmik atortariaqartaratsigit, uagut naliliinerput malillugu, imernikinnerusimagaluarpata pisimasinnaasariaqanngikkaluartunut, Jesper Olesen, Nuummi Dronning Ingridip Peqqissaaviani nakorsaaneq taama oqarpoq.
Pisuni 30-t sinnerlugit amerlassuseqartunit napparsimaveqarfimmit sullissinneqartariaqarsimasuni arfineq-pingasut 18-it inorlugit ukioqarput.
- Inuusuttuaqqat taama amerlatigisut imigassartorsimanermik kinguneranik ajoqusersimasut peqqissaavimmit ikiorneqartariaqartarnerat assut isumakulunnarpoq, nakorsaaneq oqarpoq.
Inuusuttut
Jesper Olesenilu imigassaq ikiaroornartullu pillugit siunnersuisoqatigiit siulittaasuannit, inuusuttunut ukkatarinnittumit, taperserneqarpoq.
- Meeqqat inuusuttullu peqqissusaat aamma ineriartornerat iluatsittumik ineriartortissagutsigu, taamaalillutalu aanngajaarniutinik atuinerat appartissagutsigu, taava ataasiakkaat anniaatigisaannut suliaqartarnerput qimattariaqarparput. Taarsiullugu ajornartorsiutit toqqammavii paasisariaqarpagut, Frederik Lundblad imigassaq ikiaroornartullu pillugit siunnersuisoqatigiit siulittaasuat oqarpoq.
Aviisimi AG-mi atuarnerugit. Aviisi uani pissarsiariuk: