Imigassartorsimatillutik biilertut siornatulli iinnarput
Imigassartorsimallutik biilertut pillugit suliat siornatut iinnarput, Kalaallit Nunaanni Politiit kisitsisaataasa tamanna takutippaa.
Allaaserisami siullermi atuarneqarsinnaagaluarpoq imigassartorsimallutik biilertut siornarnit ikinnerusut. Kisitsisilli assigiinngitsut ajoraluartumik sanilliunneqarsimapput, taamaammat allaaserisaq allanngorpoq.
Imigassartorsimallutik biilertut pillugit suliassat siornatulli iinnarput. Kalaallit Nunaanni Politiit Sermitsiaq.AG-mut taama ilisimatitsipput.
2017-imi imigassartorsimallutik biilertut pillugit suliassat 157-iusimapput. Kalaallit Nunaanni Politiit kisitsisaataasa kingulliit takutippaat nunatsinni aqqusinerni biilinik ingerlatsisut imigassartorsimasut unitsinneqartut maannamut 147-sut. Kisitsit taanna ukiup naannginnerani annerulersinnaavoq.
Juulli ulapaarfiusarpoq
Juulli ileqqunik nuannersunik malitseqartarpoq. Piffissarli tamanna ajoraluartumik aamma imigassartorsimalluni biilertunik naammattoorsiffiusarpoq.
- Imigassartorsimallutik biilertut pillugit maanna immikkut suliaqarpugut. Piffissami aalajangersimasumi biilertut imigassartorsimanersut pillugit nakkutilliivugut, piffissanilu ilimanaateqarnerusuni, soorlu julefrokostip akissarsinerulluunniit nalaani, imigassartorsimasunik biilertunik naammattoorsinissatsinnut nakkutiginninneruvugut. Taakku saniatigut imigassartorsimalluni biilernerup unitsinneqarnissaanut assigiinngitsunik paasissutissiissutissanik suliniuteqarpugut, Kalaallit Nunaanni sillimaniarnermi pisortaq, Søren Liisberg, oqarpoq.
Julefrokosterneq aallartimmalli, tassa novembarip 22-anili maannamut imigassartorsimallutik biilertut pillugit suliassat 18-it suliakkiunneqareersimapput. Kalaallit Nunaanni Politiit taama ilisimatitsipput.
Decembarimi imigassartorsimalluni biilertumik agguaqatigiissillugu ullormut ataatsimik politiit naammattoorsisarput. Juullip qaammataani inuit 16-it imigassartorsimallutik biilertut unitsinneqarsimallutik.