Imigassartorsimallutik biilertut arlallit Nuummi unitsinneqarsimasut

Nuummi imigassartorsimallutik biilertut ikinnerpaamik pingasut Nuummi Politiinit arfininngornerup unnuaani unitsinneqarsimapput. Imigassap aammi annertussusaa aalajangiisuussaq qanoq kinguneqartitsisoqarnissaanut.

Nuummi imigassartorsimallutik biilertut arlallit politiit arfininngornerup unnuaani ullaassaanilu unitsinneqarsimapput.

Kalaallit Nunaata Politiivini pigaartut pisortaat, Gedion Quist Sermitsiaq.AG-mut ilisimatitsivoq imigassartorsimallutik biilertut ikinnerpaamik pingasut unitsinneqarsimasut.

- Nuummi politiit biilertunik ikinnerpaamik pingasunik unitsitaqarput, aquttuusut imigassartorsimallutik biilertut. Taakku imigassartorsimallutik biilersimasutut pasineqarput, taakkulu qanoq aalakoortiginersut qulakkeerniarlugu aaverneqarput, Gedion Quist Sermitsiaq.AG-mut ilisimatitsivoq.

Aammi imigassap annertussaa kingunissaanik aalajangiisuussaaq

Imigassartorsimallutik biilertut pineqaatissinnissartik naatsorsuutigissavaat. Pineqaatissiissut imigassap aammi annertussusaa malillugu aalajangerneqartartoq, pigaartut pisortaat ilisimatitsivoq.

- Imigassartorsimalluni biilertoq minnerpaamik akiligassitsinnissamik naatsorsuuteqarsinnaavoq, piffissamilu killiliussami misiliummik biilersinnaanermut allagartaqassalluni, piffissami killiliussami aammaarluni unioqqutitsiguni allagartaminik arsaagaasussanngorlugu, Gedion Quist ilisimatitsivoq.

Nunap sinnera eqqissisimanarnerusimavoq.

Powered by Labrador CMS