Imigassartorsimallutik angalasut unnerluutigineqartut pingasut
Kapisillit-festivalimut atatillugu politiit immikkut suliniuteqarput.
Nuuk-Kapisillit Tourimut atatillugu Kalaallit Nunaanni Politiit ukioq manna aamma immikkut suliniuteqarput, tassani Kapisillit Festival aamma ingerlanneqarpoq.
Umiatsiamik angalasorpassuit Kapisilinnukarput, politiillu umiatsiat arlallit isumannaallisaanermut atortui misissorpaat, umiatsiamillu angalasut imigassamik aalakoornartulinnik imersimannginnersut nakkutigalugu.
Misissuinermi katillutik inuit pingasut imigassartorsimasutut unnerluutigineqarput, pigaartut pisortaat Malik Olesen, Sermitsiaq.AG-mut oqaluttuarpoq.
Inuit taakku pingasut tamarmik sumiiffimmi aaversipput, politiit suliami nakorsamik suleqateqarmata.
Politiit oqarnerat naapertorlugu arfininngormat Kapisilinni umiatsiat 150-it missaanniipput, umiatsiamilu isumannaallisaanermullu atortoqannginneq pillugu unnerluutigineqartoqarsimanersoq, pigaartut pisortaat paasissutissaateqanngilaq.