Imigassartorsimalluni lastbiilinik aallarussisimasoq
Qaqortumi politiit ataasinngornerup ullaavai lastbiilimik aallarunneqarsimasumik ujaasisimasut.
Politiit ataasinngornermi nal. 05.00-p missaani nalunaarfigineqarsimapput, Qaqortumi lastbiili aallarunneqarsimasoq.
Nalunaarutinnittup oqaatigisimavaa lastbiilimik ingerlatsisoq aalakoorpasittoq, taamatullu nalunaaruteqartoqarmat Nuummi politiit pigaartuisa Qaqortumi politiit kalerrissimavaat.
Pigaartut pisortaata Malik Sandgreenip tamanna Sermitsiaq.AG-mut ilisimatitsissutigaa.
- Politiit tamatuma kingorna lasbiili umiarsualivimmiittoq takugamikku malillugu unitsissimavaat, Malik Sandgreen oqaluttuarpoq.
Alkometerimi killissarititaasoq sinnerlugu takutitsisumik supusisoq
Angut arnarlu tamarmik tyvikkunnik ukiullit lastbiilimiittut naammattoorneqarput. Taakku lastbiilip igalaava aseroriarlugu isersimarpasipput.
Alkometerikkut takuneqarsinnaasimavoq, taakku marluulluik imigassartorsimasut, marluulluillu tigusarineqaramik politeeqarfiliaanneqarsimapput.
- Lasbiilimik aallarussisimasutut unnerluunneqarnermik saniatigut imigassartorsimallutik biilersimasutut unnerluunneqassapput, Malik Sandgreen oqarpoq.
Angut arnarlu aaversereeramik iperangaasimapput.