Imigassartorsimalluni biilertup biilimi ingerlatinniarnera ajornartorsiutigisimagaa
Ullormi kingullermi imigassartorsimallutik biilertut marluk unnerluutigineqarsimapput.
Politiit tallimanngornerup ulaavani, innuttaasup ataatsip nalunaaruteqarneratigut Nuup illoqarfiata immikkoortortaanut Nuussuarmukarsimapput.
Innuttaasup nalunaaruteqartup biilimik ingerlatsiniarsarisoq eqqumiigisimavaa. Biilimi uneqattaaginnavissimagami.
Politiit biilertoq tigusarigarigamikku 20-kkut qiteqqullugit ukioqartoq paasisimavaat, biilertorlu alkometerimut supisinneqarmat akuerisaasut sinnerlugit imigassartorsimasoq paasineqarluni. Tamatuma saniatigut angut biilinik ingerlatsisinnaanermut allagartaqanngilaq.
Pigaartut pisortaata Preben Kleistip oqaluttuaraa, angut imigassartorsimalluni biilersimasutut aamma biilinik ingerlatsisinnaanermut allagartaqarani ingerlatsisimasutut unnerluutigineqartoq.
Tasiilami persuttaasoqarsimasoq
Tasiilami angut aamma biilinik ingerlatinnani imigassartorpallaarsimavoq. Tassani aamma politiit innuttaasumit eqqummaarissumit nalunaarfigineqarsimapput. Politiit suliani taakkunani marluusuni aaviisimanerit misissoqqissaarneqarneranni akissutissat utaqqivaat, akissutitigut pineqartut aamikkut qanoq imigassaqartiginersut takutissammatigit.
Preben Kleist naapertorlugu, ullormi kingullermi pisimasut saniatigut Kujataani angerlarsimaffinni arlalinni eqqissiviilliortoqarsimavoq. Politiit Qaqortumi angerlarsimaffinnut marlunnut, Narsami ataatsimut Nanortalimmilu marlunnut orniguttariaqarsimapput.
Tasiilami aamma aappariit akornanni persuttaasoqarsimanera pillugu suliamik aallartitsisimapput. Taakku marluullutik aalakoorsimapput, suliarlu suli ingerlanneqartoq, pigaartut pisortaata oqaluttuaraa.