Imigassartoqqusinnginnerup nalaani atornerluisut immikkut ikiorserneqassanngitsut
Naalakkersuisut, kommuni peqqinnissaqarfilluunniit aalakoornartortalinnik tuniniaanissamut inerteqquteqarnerup atuutsinneqalernerani, ilaqutariinni angajoqqaat marluullutik atornerluisuusut ikiorserniarlugit iliuuseqarsimanngillat
Arlalinnit ernummatigineqarpoq, meeqqat ilaqutariinni atugarliortuni najugallit illersorniarlugit suliniutigineqartoq pitsaagaluarluni, saniatigut allatut iliuuseqartoqanngippat kingunerluuteqarsinnaanera. Imigassamimmi pinngitsuuisinnaatsoq imigassamik pissarsisinnaajunnaarpat, ilaqutariinni eqqissiviilliortoqalersinnaanerata iliuuseqarfigineqarnissaa pisariaqassammat.
Kim Kielsenip ataasinngormat tusagassiortunik katersortitsinermi oqaatigaa, nutaanik iliuuseqarnissaq kommunip akisussaaffigigaa. Tassunga atatillugu erseqqissaatigaa, imigassamik tuniniaaqqusiunnaarnermut atatillugu kommuninit tamanit taperserneqarluni.
Kommuneqarfik Sermersuumit ilisimatitsissutiginqarpoq, imigassamik kingunerlutitsisut katsorsarneqarnissaat peqqinnissaqarfiup akisussaaffigigaa, aamma atornerluinermik katsorsaasarneq Allorfimmit ingerlanneqartartoq. Tassa ikiorserneqarnissamut assigiinngitsorpassuarnik periarfissaqareerpoq.
Ikiorserneqarnissamut periarfissaqartoq
Tassa ikiorserneqarnissamut periarfissaqareerpoq, aamma neqerooruteqarpoq nammineerluni saaffiginnissutigineqartussanik. Taamaammat ilaqutariinnut atugarliortunut immikkut ittumik ikiorsiiniarlunik iliuuseqartoqarsimanngilaq. Kommunimit eqqumaffigineqarpoq, imigassamik matusinerup kingunerluuteqarsinnaanera. Kommuneqarfik Sermersuumi pisortap Lars Møller-Sørenseniip Sermitsiaq.AG-mut erseqqissaatigaa, kommuni akisussaaffeqarfigisamini sutigut tamatigut ikiuukkumaartoq.
- Soorunami katsorsarneqarnissaq anguniarlugu kommunimut saaffiginnittut tamarmik ikiorsiisussanut eqqortunut innersuutassavavut. Kommunit imigassamik atornerluisut katsorsarneqarnissaannut aksisussaasuunngillat, taamaammat maannatut pisoqarnissaanut upalungaarsimasoqanngilagut, taanna oqarpoq.
- Kommuneqarfik Sermersuumi meeqqanut isumaginnittoqarfimmi pigaartut amerlassusaat allanngornikuunngillat, taamaammat imigassap matuneqarnerata kinguneranik isumaginninnikkut suliassanngorsinnaasunik isumaginninnissamut piareeqqavugut, Lars Møller-Sørensen oqarpoq.
Oqarasuaatikkut saaffiginnittoqartassasoq
Naalakkersuisut ataasinngormat ualikkut tusagassiortunik katersortitsinermi nassuerutigaat, imigassap inerteqqutaalernerata kinguneranik immikkut ittumik ikiorserneqarnissamik pisariaqartitsilertoqarsinnaasoq.
- Innuttaasut imigassamik akulikitsumik atuingaatsiartartut pisumi matumani immikkut ikiorserneqarnissamik pisariaqartitsilersinnaapput. Naalakkersuisut taamaammat, assersuutigalugu imigassamik annertuumik kingunerlutsitsisoqarnerani katsorsarneqarnissamilluunniit pisariaqartitsisoqarnerani saaffiginniffissatut periarfissat uku eqqumaffigeqquaat.
Ikiorserneqarnissamut periarfissat
Imigassamut atatillugu kingunerlutsitsinermi naliliiffigineqarnissaq katsorsarneqarnissarlu anguniarlugu Peqqinnissaqarfik attavigineqarsinnaavoq, uku aqqutigalugit:
Ulluinnarni nal, 8.15-ip qulillu akornanni oqarasuaat 80 11 11.
Ulloq unnarulu oqarasuaat 34 44 00
Saaffiginninnerit tamarmik oqarasuaatikkut pisassapput, tassani takkulluni misissuisoqassanersoq nalilerneqartassaaq.
Aanngajaarniutinik ajornartorsiuteqarnermi katsorsaaneq ingerlaannassasoq
Allorfik Nuummiittoq ullut tamaasa nal. qulingiluat ualikkullu pingasut akornanni saaffiginearnissamut suli ammavoq.
Allorfik Sermersooq uku aqqutigalugit saaffigineqarsinnaavoq:
Oqarasuaat: + 299 531242 maililu: allorfik.sermersooq@allorfik.gl
Naalakkersuisunit ilimatitsissutigineqarpoq, corona pissutigalugu Allorfimmut saaffiginninnissamut assigiinngitsunik malittarisassaqartoq.
- Saaffinnissutit oqarasuaatikkut mailikkulluunniit pisarnissaat innersuussutigineqarpoq. Katsorsaavimmi katsorsaanerit tamarmik, eqimattanik katsorsaasarneq kisiat pinnagu, pilersaarutit malillugit pisasssapput, taamaattoq oqarasuaat Skypeluunniit aqqutigalugit. Tamanna aamma qanigisaasunut katsorsaaviup neqeroorutigisartagaanut atuuppoq.
Nuummi Katsorsaavimmi innuttaasut katsorsarneqareersut katsorsarneqarnerat ingerlaannassaaq, innuttaasunilli katsorsarneqartussanik nutaanik tigusisoqaqqissanngikkallarpoq.