Imigassap annertussusaa appariarpoq
2022-mi imigassamik aalakoornartortalimmik 2021-mut sanilliullugu annikinnerusumik pisisoqarlunilu tunisassassiortoqarpoq, Naatsorsueqqissaartarfimmit kisitsisit nutaat tamanna takutippaat.
Imigassamik aalakoornartortalimmik eqqussinerup aamma tunisassiornerup katinnerini appariartoqarpoq.
Naatsorsueqqissaartarfimmit kisitsisit takusassiat nutaat naapertorlugit 2022-mi imigassamik aalakoornartulimmik 370 tusind literinik nunatsinnut eqqussuisoqarlunilu tunisassiortoqarpoq, tamannalu ukiup siulianut sanilliullugu 5,9 procentinik appariarneruvoq.
Ukiullu 30-t ingerlanerini imigassamik pilersuineq 35,2 procentinik appariarsimavoq. (Ataani titartagaq takuuk).
Imigassamik atuisarnerup annikinneruleriartorneranik kisitsisit ersarissumik takutitsipput.
2022-mi imigassamik aalakoornartortalimmik pilersuineq inummut ataatsimut 15-ileereersimasumut 8,2 literinik naleqarpoq. 2021-mut sanilliullugu inummut ataatsimut 0,5 literimik imaluunniit 6,2 procentimik appariarpoq, 2021-mi imigassamik aalakoornartortalimmik pilersuineq inummut ataatsimut 8,8 literimik annertussuseqarsimammat. (Tabeli uani ataani takuuk).
8,2 literi imigassap aalakoornartua inuup ataatsip atuisup 15-ileereersimasup agguaqatigiissillugu 2022-mi sapaatip akunneranut 10,6-inik imigassartortarpoq, imigassaq ataaseq 1,5 cl-imik akuitsumik aalakoornartortaqartillugu, Naatsorsueqqissaartarfik allappoq, nangillunilu:
10,6-init sapaatip akunneranut imerneqartartunit, baajat 7,5-iupput, viinnillu katillugit 1,9-ullutik imigassarlu 1,1-imik naleqarluni.