Imigassamut inatsit sakkukillineqaqqittoq
Naalakkersuisut imigassamut inatsimmik allannguissapput, neriniartarfiit akunnittarfiillu ulluinnarni matoqqasumik aaqqissuussisoqartillugu imigassallernissamut akuersissummik qinnuteqarsinnaanngorlugit.
Inatsisartut aalajangerput imigassamut inatsit sakkukilleqqinneqassasoq. Demokraatineersup Malene Vahl Rasmussenip siunnersuutaa ataasinngormat tamani taperserneqarluni akuerineqarpoq.
Siunnersuutigineqarpoq neriniartarfiit, akunnittarfiit imerniartarfiillu matoqqasumik aaqqissuussisoqartillugu, ulluni sapaammiik sisamanngornermut ullaassakkut nalunaaqutaq sisamat tungaanut imigassamik sassaalliinissamut qinnuteqarsinnaanngornissaat.
Matoqqasumik immikkulluunniit ittumik aaqqissuussat tassaasinnaapput inuuissiornerit katittoqarneraluunniit.
Ullumikkut sapaatip sisamanngornerullu akornanni katerisimaartitsinermi, taamaallaat ullup-qeqqata unnuap-qeqqatalu akornanni imigassallertoqarsinnaavoq. Tassa tallimanngornerup arfininngornerullu avataanni katiffissioraanni inuuissioraanniluunniit sassaallerneq unnuap-qeqqanut unitsinneqartussaavoq.
Ataatsimiititaliamit taperserneqartoq
- Demokraatini isumaqarpugut innuttaasut peqatigiiffiilluunniit pisuni aalajangersimalluinnartuni immikkut nalliuttorsiorsinnaasariaqaraluartut neriniartarfinni imaluunniit allani assigusuni tallimanngornerup arfininngornerullu avataani taamaattumik manna siunnersuut saqqummiupparput, Malene Vahl Rasmussen siunnersuumminut tunngavilersuilluni allappoq.
Imigassamut inatsit siorna aamma sakkukillineqarpoq, ilaatigut pisiniarfiit imigassamik tunisaqarsinnaanerat sivitsorneqarami.
Malene Vahl Rasmussenip siunnersuutaa Inuussutissarsiornermut Aatsitassanullu Ataatsimiiitaliamit taperserneqarpoq.
Ataatsimiititaliamut erseqqissaassutigineqarpoq, imigassamik aalakoornartortalimmik atuinerulerneq inooqataanikkut pitsaanngitsumik sunniuteqarsinnaasoq.
Nakkutigineqartumik pisartoq
Ataatsimiitialiamit aappaatigut oqaatigineqarpoq, neriniartarfinni imerniartarfinniluunniit sassaalliisarneq nakkutigineqartumik pisartoq, tassa imigassaq pillugu inatsimmi malittarisassat malillugit imigassallersinnaanermut akuersissummik peqarnissamut malittarisassat malinneqartartut.
- Taamaalillunilu piffinni taakkunani aaqqissuussinerit nakkutilliiffiusumik torersumillu ingerlanneqarnissaannut kajumissaataassaaq, Inuussutissarsionermut Aatsitassanullu Ataatsimiititaliaq isumaliutissiissummini allappoq.
Naalakkersuisut maanna inatsimmut allannguutissatut siunnersuusiussapput, siunnersuut Inatsisartuni suliarineqaqqissaaq. Tamatuma kingorna aalajangiisoqassalluni.