Imigassamut ikiaroornartumullu akiuiniarluni annertusisamik iliuuseqarneq

Else Poulsen, tarnip pissusiinik ilisimasalittut ilinniagalik kiisalu Nuna Tamakkerlugu Ilitsersuisarfimmi Nuummiittumi aqutsisoq Imigassaq Ikiaroornartorlu Pillugit Siunnersuisooqatigiivini siulittaasunngussaaq.

Tullersortaassaaq Helga Andersen Iversen, taanna katsorsaasutut ilinniarsimasuuvoq. Helga Kofoed Skolemi Nuummiittumi atorfeqarpoq. Taakku marluullutik atornerluinermut tunngasunik, kiisalu atornerluisoqartillugu inuiaqatigiinni ilaqutariinnilu ajoqutaasinnaasunik ilisimasaqarluarput.

Tamatta akisussaaffeqarpugut

Atornerluisuunermik pinaveersaartitsinermi Siunnersuisooqatigiit suleqatiginissaat pingaaruteqarluinnartoq Peqqissutsimut Naalakkersuisoq Agathe Fontain isumaqarpoq, toqqaanerminilu nunatsinni imeriaaseq naleqqutinngitsoq taakkartorpaa:

- Qanoq imeriaaseqarnerput ataatsimoorluta eqqarsaatigisariaqarparput. Inersimasut tamatta nassuerutigisariaqarparput piffissap sivikitsup iluani sukkavallaamik annertuallaamillu imertoqartillugu siuneeruttoqartartoq silaaruttoqartartorlu, taamaattoqaraangallu ilungersunartunik pisoqarsinnaasartoq. Tamanna nassuerutigigutsigu aatsaat ataasiakkaat imertariaasiat allanngortinneqarsinnaanngussaaq. Meeqqat takusarpaat inersimasut qanoq imertarnersut meeqqallu inersimasunik ilaarsisarlutik. Kikkulluunniit atornerluinermik unitsitsissallutik akisussaaffeqarput.

Suliffeqarfik akisussaaqataavoq

Agathe Fontain kaammattuivoq suliffeqarfiit imigassartornermut politikkeqalissasut kiisalu ataatsimoortoqassatillugu imigassaq inituallaarlertarmat ataatsimooriaatsimik allannguissasut.

Atornerluinerup silarsuaani katsorsaavinnik Allorfinnik kommunini tamani pilersitsinerit alloriaataasimapput. Siulleq ukioq manna marsip aallartilaarnerani Qaqortumi ammarneqarpoq. Katsorsaavinnik ammaasoqarnerata kingorna amerlanerit katsorsartissinnaanngorput, katsorsartikkusuttullu Nuummut katsorsartikkiartorlutik aallartariaqarunnaarlutik.

Paasissutissat Imigassaq Ikiaroornartorlu pillugit Siunnersuisooqatigiinnut tunngasut

Imigassaq Ikiaroornartorlu pillugit Siunnersuisooqatigiit pinaveersaartitsinermi, peqqissutsimut tunngasutigut misissuinikkut katsorsaanikkullu siunnersuisussatut inissisimapput. Ilisimatuussutsikkut misissuinerit nutaat kiisalu imigassamik, ikiaroornartumik ludomanimullu tunngasut malinnaavigisarpaat. Naalakkersuisut naalakkersuisoqarfiillu siunnersortarpaat atornerluinerullu iluani anguniagassanik iliuusissanillu siunnersuuteqartarlutik.

Siunnersuisooqatigiit qulingiluanik ilaasortaqarput. Taakkunanit tallimat nakorsaaneqarfimmit, politiinit, kommunit kattuffiinit naalakkersuisoqarfinniillu paasisimasalittut toqqagaapput. Taakku sinneri Peqqissutsimut Naalakkersuisumit kiisalu meeqqanut inuusuttunut, timersornikkut, ludomani aamma katsorsaavimmit toqqarneqartarput.