Imigassaq
Imigassamut atornerluinermulli inatsisissaq: Aajuku suliniutigineqartut
Inatsissatut siunnersuummi Naalakkersuisoq Agathe Fontainip, 18-it inorlugit ukiullit annertuumik atornerluisuutillugit pinngitsaalillugit inissiisalernissap periarfissaanissaa atuutsitsilerusuppaa. Imigassamulli maleruaqqusat arnat 18-it inorlugit ukiulinnut sakkortusarneqassapput.
Peqqissutsimut Naalakkersuisup, Agathe Fontainip, inatsisissami arnat 18-nit inorlugit ukiullit pinngitsaalillugit inissinneqarsinnaalernerat atuutsinneqalissaaq, tassani pineqartoq annertuumik atornerluisutut nalilerneqarpat.
Atuaruk: Siunnersuut: Imigassanik akikilliisoqartarunnaassaaq
- Inuit pisinnaatitaaffiinik isumaqatigiissummut akerliunersoq misissorsimavarput, taamaattoqanngitsorlu misissuinitta takutippaa. Naartoq illersorniarlugu inatsisissaq atuutsilerusupparput, marlunngormat Agathe Fontain, Inatsisartuni tusagassiortunut katersortitsinermini oqarpoq.
Imigassamik maleruaqqusat sakkortusineqartut
Tusagassiortunik katersortitsinermi atornerluinermik inatsisip saniatigut imigassamik inatsit aamma eqqartorneqarpoq.
Atuaruk: Imigassat akikillineqartarnerinut inerteqquteqarnissaq tapersersuisoqanngitsoq
Agathe Fontanip tassani nassuiaatigaa imigassamik inatsisissami inuusuttut 18-it inorlugit ukiullit nalunaaquttap qulip kingorna nerinartarfinneeqqusaajunnaarlutillu café-neeqqusaajunnaassaasut imigassamilluunniit sassaallerfiusuni. Tamanna aamma angajoqqaanik inersimasumilluunniit najorneqaraluaaraanni atuuppoq.
- Imigassaq pineqartillugu nunat Island aamma Savalimmiut assigalugit pissaagut. Taakkku assersuutigalugu Danmarkimut sanilliullugit imigisassamik atuinikinnerujussuuput, Agathe Fontain oqarpoq.
Taamaammat inuusuttut 18-it inorlugit ukiullit imigassanik sassaallerfinni nalunaaquttap 20-22 akornanni taamaallaat najuussinnaalissapput, piffissamilu tassani angajoqqaaminnik inersimasumilluunniit ilaqartassapput.
- Inuusuttut takutissavagut imigassaq pillugu sakkortuumik inatsiseqarluta, Peqqissutsimut Naalakkersuisoq oqarpoq.
Sapaatit akunnerisa naanerini imigassanik tuniniaaneq allanngortinneqassaaq
Allaaserineqareersimasutut, sapaatit akunnerisa naanerini imigassanik pisisinnaaneq aamma allanngortinniarneqarpoq. Tamannalu arfininngornermi imigassarsisinnaaneq taamaallaat nalunaaquttap 11:00 - 14:00-llu akornanni pisinnaalissaaq, ullumikkut nalunaaqutaq 09:00 - 13:00-llu akornanni pisisoqarsinnaavoq.
Aammattaaq juulliaqqami, juullimi juullillu naggataani imigassanik sassaallersinnaaneq inerteqqutaalissaaq.