Imigassaq
Imigassamik neqerooruteqarneq inerteqqutigineqanngilaq
Imigassamik neqerooruteqartarnerup 'happy hour'-illu inerteqqutigineqarniarnerinut pilersaarutit, imigassamut inatsisissami peerneqarput
Immiaaqqat qulit 149 koruunilerlugit. Imigassamut inatsisissaq akuerineqassangaluarpat, taama neqerooruteqarneq takuneqarsinnaajuassaaq.
Imingassamik neqerooruteqartarnerup inerteqqutigilernissaanut pilersaarutit, tusarniaanerup kingorna inatsisissatut siunnersuummit peerneqarpoq.
Tamanna pisiniarfiit niueriaasiannik annertuallaamik kalluaassasoq arlalinnit tikkuarneqarneranit pivoq.
- Nioqqutissanik neqerooruteqartaneq pillugu, pisiniarfiit pitsaasumik niuernermik ingerlatsiniarnerannik pisinnaatitaaffiiagaassasut KNI oqaaseqarpoq. Oqaaseqarnerlu Naalakkersuisoqarfimmit tusaatissatut tiguneqarpoq, taamaasilluni neqerooruteqartarnermut inerteqquteqarniarneq siunnersuummit atorunnaarsinneqarluni, Peqqissutsimut Naalakkersuisoqarfik inatsisissamut siunnersuummi ilanngussamini allappoq.
Taamaattoq inatsisissaq akuerineqassappat neqeroorutit taama ittut aviisini takuneqarsinnaajunnaassapput. Imigassanummi neqerooruteqartarnerup inerteqqutigineqarniarnera attatiinnarneqarpoq.
Taamaattooq pisiniarfinni immikkoortoqarfinni assiaqutterneqarsimasuni, imigassaarniarfiulerumaartussani, pilerisaarisoqarsinnaassaaq.