Imigassamik inerteqquteqarneq: Sermersuumi borgmesterip ineriartorneq malinnaaffigigaa

Kommuneqarfik Sermersuumi imigassamik inerteqquteqalernissaq pisariaqassappat, borgmesterip Charlotte Ludvigsenip gruppini siulittaasut oqaloqatiginiarpai.

Qeqqata Kommuniata imigassamik inerteqquteqarallarnissaq Naalakkersuisunut qinnutigisimavaa. Kommuni coronavirusip tuniluunnera killilersimaarniarlugu aamma angerlarsimaffinni imigassamik atuinerulertoqassappat meeqqanut kingunerluuteqarsinnaanera pinngitsoortinniarlugu taamatut qinnuteqarsimavoq, tassa Naalakkersuisut sassaallertarfiit unnukkut quliniit ullaakkut tallimat tungaannut matoqqasarnissaannik aalajangernerisa kingorna qinnutigisimavaa.

Qeqqata Kommuni maannamut kisiartaagallarluni imigassimik inerteqquteqarnermik atuilersimavoq. Suliiffiit imigassamik inerteqqummik atuinngitsut ilagaat illoqarfiit pingaarnersaat Nuuk.

Nuummi corona juullimili tuniluutingaatsiarpoq, sassaallertarfiillu Qeqqata Kommuniatuulli unnukkut quliniit ullaakkut tallimat tungaanut matoqqatinneqartarlutik.

Borgmesterip Charlotte Ludvigsenip Sermitsiaq.AG-mut ilisimatitsissutigaa, imigassamik inerteqquteqarnerup atuutsinneqalernissaa suli pisariaqartinneqanngitsoq isumaqarluni:

- Imigassamik inerteqquteqartoqannginnissaa inassutigigaa

- Imigassamik inerteqquteqalernissap aalajangiiffigineqapallannissaa maannakkorpiaq inassutigisinnaanngilara, ullunili tulliuttuni inuiaqatigiinni susoqassanersoq malinnaaffigissavara, oqartussatullu iliuuseqarnissaq pisariaqalissappat, gruppini siulittaasut oqaloqatigissavakka Naalakkersuisunut saaffiginnittoqarnissaa pillugu, borgmesteri allakkatigut akissuteqarluni allappoq.

Illoqarfiit pingaarnersaanni Nuummi siusinnerusukkut imigassamik inerteqquteqartoqarsimavoq. Naalakkersuisunut siulittaasuusimasup Kim Kielsenip nunarsuarmi tuniluuttoqarnera aallartimat, inerteqquteqarneq 2020-mi martsip qaammataani atuutsilermagu.

Borgmesterilli maannamuugallartoq neriuutiginerarpaa, innuttaasut tuniluunnerup killilersimaarneqarnissaanut oqartussat inassuteqaataannik malinnissasut.

-Taamaammat neriuutigilluinnarpara, innuttaasut tuniluuttoqarneranik killilersimaarinninnermut akisussaaqataassasut, oqartussallu inassuteqaataannik malittarisassanillu atuuttunik malinnissasut, borgmesteri allappoq.

Powered by Labrador CMS