Imigassamik atuineq apparujussuartoq
Kalaallit imigassartortarnerat ukiut 30-t ingerlaneranni affaannanngorpoq.
2018-imi imigassaq akoqanngitsoq 327.000 literi nunatsinni eqqunneqarlunilu tunisassiarineqarpoq. Ukiup siulianut sanilliukkaanni 43.000 literimik annikinneruvoq, tassa eqqunneqartoq tunisassiarineqartorlu 11,6 procentimik appariaateqarluni.
Imigassamik atuineq ukiuni 30-ni kingullerni misissussagaanni 54,7 procentimik appariaateqarsimavoq, tassa imigassaq 395.000 literi.
Kalaallit Nunaanni Naatsorsueqqissaartarfiup kisitsisaatai nutaat saqqummiunneqaqqammerput, imigassanillu atuineq imigassanut kimittuunut, viinninut immiaaqqanullu immikkoortiterneqarsimavoq. Kisitsisini takuneqarsinnaavoq 2018-imi viinnip imerneqartarnera apparnerpaasimasoq, imigassallu kimittuut tulliullutik appariaateqarsimallutik.
Imigassanik kimittuunik niueruteqarneq 2017-imiit 2018-imut 3,8 tusind literinik appariarsimavoq. Imigassanik kimittuunik eqqussuinermi tunisassiornermilu imigassamik akoqanngitsumik niueruteqarneq 2018-imi 28,5 tusind literiuvoq, ukiup siuliani 32,3 tusind literiusimasoq. Appariaat procentinngorlugu 11,7-iuvoq.
Viinninik niueruteqarnermi imigassamik akoqanngitsumik eqqussuineq tunisassiornerlu 58,7 tusind literinut 2018-imi appariaateqarsimavoq, ukiup siuliani 72,9 tusind literiusimalluni. Tamanna 14,2 tusind literinik appariaataavoq, procentinngorlugu 19,5-iulluni.
Immiaaqqanik niueruteqarnermi imigassamik akoqanngitsumik eqqussuineq tunisassiornerlu 2018-imi 240,2 tusind literiusimavoq, ukiup siualiani 265,0 tusind literiusoq. Tamanna imigassamik akoqanngitsumik eqqussuinermi tunisassiornermilu 24,8 tusind literinik appariaataavoq, procentinngorlugu 9,4-lluni.
Nunatta Karsia 2018-imi imigassamut akitsuutinit 167 milliuunit koruuninik isertitaqarpoq. Isertitat 2017-imut sanilliukkaanni 23 milliuunit koruuninik appariaateqarput.
