Imigassamik atornerluineq 337 millioninik akeqarpoq: Iliuuseqartoqannginnera kanngunartuuvoq

Imigassartortarneq minnerulerpoq, tamatumali inummut aningaasatigullu sunniutai suli annertoorujussuusinnaasarput. – Inuunerup sinneranut kingunerluutaasinnaapput, Naalakkersuisunut ilaasortaasimasoq tikkuaavoq.

Nunatsinni nunanit allanit arlalinnit imigassartortukinnerulerpoq, tamannali suli ajornartorsiuterpassuarnik pilersitsisarluni.

Innuttaasut quliugaangata arfineq-marluk aanngajaarniutinik ilungersunartumik ajornartorsiuteqartut, namminneq angerlarsimaffimminni imigassamik ajornartorsiuteqarfiusuni peroriartorsimasarput. Naalakkersuisunut ilaasortaq Mimi Karlsen akissuteqaatitut allakkamini taama ilisimatitsivoq, tamatumanilu kisitsisinik Nuummi Allorfimmi katsorsaavimmeersunik innersuussilluni.

Aviisi AG taama allappoq.

- Ilaqutariinni aanngajaarniutinik ajornartorsiuteqarfiusuni peroriartorneq isumaliortaatsikkut ikilerneqarnermik kinguneqarsinnaavoq, Mimi Karlsen erseqqissaavoq, tamatumunngalu atatillugu pissutsinik meeraanermi atukkanik ingerlatitseqqittarneq erseqqissarlugu imalu ilassuteqarluni:

Inuit katsorsarneqartut affangajaat namminneq angerlarsimaffimminni 18-it inorlugit ukiulinnik meeraqarput.

Mimi Karlsenip parteeqataata Agathe Fontainip Inatsisartuni sapaatip akunnerata siuliani inuiaqatigiinni ernguttarnerup ilungersunartorsiortitsinera saqqummiuppaa. Nunatsinni imigassamik atuineq appariarsimagaluaqaaq, soorlumi Danmarkimi atuinermit minnerulersimalluni. Atornerluisulli assigiinngitsorpassuartigut inuunertik aserortarpaat, qaniginerpaasamillu inuunerat akornusersortarlugu.

Taamaattumik Agathe Fontainip neriuutigaa, partiit akimorlugit taperserneqassasoq Nunatsinni ukiunut arlalinnut atuuttumik imigassamut politikeqarnissaq, ilisimatusarneq piviusullu aallaavigalugit.

Naalakkersuisunillu tamanna isumaqatigineqarpoq.

- Imigassamut politikki ukiut qulit sinnerlugit atuuttussatut Naalakkersuisut kissaatigaat, tamatuma Inatsisartuni oqallisigineqarnerani Mimi Karlsen akuersaarluni taama oqarpoq.

Aviisimi AG-mi atuarnerusinnaavutit. Aviisi uani pissarsiariuk:

Powered by Labrador CMS