Imigassallernermut inerteqquteqarneq: Akissarsiffissaq borgmesterit aarlerigigaat
Peqqinnissaqarfimmi sulisut eqqissillutik sulisinnaaniassammata, Qeqqata Kommuniata imigassamik sassaallersinnaaneq tuniniaasinnaanermullu inerteqquteqarallarnertik sivitsorumallugu qinnutigaat. Kommunit marluk allat inerteqquteqartitsilernissaminnut tamanna aamma tunngavilersuutigaat.
Akissarsiffik, sulinngiffeqarnermi akissarsiassat, nunatsinnilu coronap piffissami tuniluunnerpaaffia pissutigalugit Qeqqata Kommuniata imigassamik sassaallersinnaanerup tuniniaasinnaanerullu inerteqqutaagallartinneqarnera sivitsortippaa. Kommuneqarfik Sermersooq aamma Kommune Kujalleq assiganik inerteqquteqartitsigallassallutik qinnuteqarsimapput.
Qeqqata Kommuniata inerteqquteqartitsineq 1. februarip tungaanut sivitsortippaa. Kommune Kujalliup aamma Kommuneqarfik Sermersuup inerteqquteqarallartitsineq 9. februarip tungaanoortunngortikkaat.
- Tunngavilersuutigaarput pingaartumik akissarsiffiup nalaani imerniartarfiit matuneqarnerisa
kingorna angerlarsimaffinni aalakoornartortalinnik ernguttoqarsinnaanera aarlerinarmat,
tamatumalu malitsigisaanik angerlarsimaffinni eqqissiviilliornerit pisinnaanerat aarlerinarmat.
Tamatuma saniatigut aamma Nunap immikkoortuani nakorsaanerup Kommunimut
saaffiginnikuuvoq kissaateqarluni matusigallaqqaneq sivitsorneqassasoq, Qeqqata Kommuniani borgmester Malik Berthelsen oqarpoq.
Politiit peqqinnissaqarfillu artukkerneqartut
Naalakkersuisut imigassamik sassaallertarfiit ammasarfiinik killilersuinertik sapaatip akunneranik sivitsorpaat. Tamanna isumaqarpoq sutoriartortarfiit imerniartarfiillu nalunaaqutaq 22.00-imiit 05.00-ip tungaanut imigassanik sassaalliisinnaanngitsut, nalunaaqutarlu 22.30 matoreersimasassasut. Malittarisassaq taanna nunatsinni kommunini pingasuni atunngilaq, imigassamimmi tuniniaaneq sassaallernerlu inerteqqutinngortinneqarmat.
Kommunit tunngavilersuutigaat inerteqquteqarallartitsinermi peqqinnissaqarfimmi sulisut eqqissillutik sulisinnaalissasut. Peqqinnissaqarfik coronap tuniluuterujussuarnerani artukkerneqaqqavoq, soorlu aamma sulisut ilaat tunillatsissimasut.
Politiit taamatuttaaq sulisutigut unammillerneqarsimapput, januarillu naanerani angerlarsimaffinni eqqissiviilliortoqassappat sulisutigut unammillernartoqarsinnaanera borgmesterip ernumagaa.
- Immitsinnut aperisariaqalerpugut suna pingaarnerua. Imigassaq, imaluunniit peqqinnissaqarfik, politiit, inunnik isumaginnittoqarfillu ingerlaannarsinnaasut. Suliffeqarfiit pingasut taasakka tamarmik coronamit eqqugaaqqapput. Inerteqquteqarallartitsinermilu taakkunani sulisut ikiorusuppagut, eqqissillutik sulisinnaaniassammata, Kommune Kujallermi borgmester Stine Egede Sermitsiaq.AG-mut oqarpoq.
Tunillaassuuttoqarnerpaaffissaq kissaatigineqanngilaq
Nunatta nakorsaanera Henrik L. Hansen marlunngornermi tusagassiortunik katersortitsisoqarnerani oqarpoq nunatsinni tuniluunneq immikkoortut pingajuannut pisimasoq. Tassa inuiaqatigiinni annertuumik ataavartumillu tuniluuttoqartoq, peqqinnissaqarfillu artukkerneqartoq.
Kommuneqarfik Sermersuumi borgmester, Charlotte Ludvigsen, Facebookimini allappoq arlaannaataluunniit tuniluunnerup immikkoortua sisamaat, tassa inissisimalerfissat ajornerpaat, peqqinnissaqarfiup naammattumik ikiuisinnaajunnaarnissaa, arlaannaannilluunniit kissaatigineqanngitsoq.
- Ernumatigaarput weekendimi ullut 14-ikkaarlugit akissarsiaq, socialermusiallit, qaammammusisussat aammalu feriepengesisussat aningaasarsippata ernguttut amerlineritigut tuniluunneq suli annertuninngussasoq, aammalu erngunnerup kingunerisaanik ajoqusertartut allallu unioqqutitsinerit annertuseriaannaasut. Illuatungaanilli kissaatigaarput inuit suli mianersusssasut, sulimi tunillatsinneqanngitsut amerlapput. Meeqqatik ilaquttatik peqatigalugit eqqissillutik ullut makku atorumaaraat. Minnerunngitsumik peqqinnissaqarfik, politiit, utoqqaat illui, meeqqeriviit atuarfiit naammattunik sulisoqarnissaat artukkerneqannginnissaallu, allappoq.