kunngit pingasut ulluat

Imerniartarfiulitik ileqqumisaartoq: Ajortuliorfigitippugut

Jim Riis-ip Hotel Qaqortoq-mi pisortaanerup, aqagu arfininngornermi Kunngit Pingasut Ullorisussaammagu, imerniartarfiit ullumi naliginnaasumiit matujaarnerunissaat paasisinnaanngilaa.

Hotel Qaqortoq

- Ileqqumisaaginnarpunga. Suna tamarmi oqaaqqissaarinerulersimavoq. Sivisuumik ingerlalluarfiusumik inatsiseqarpugut. Naalakkersuisumillu oqaaseqartoqarpoq tamatumunnga killormoorluinnartumik. Ullualunnguanik piffissaliilluni allanngortitserisoqarpoq tamannalu paasisinnaanngilluinnarpara.

Hotel Qaqortoq-mi pisortaaneq Jim Riis, Qaqortumi imerniartarfimmik Rockhouse-mik kiisalu Narsami Arctic Café-mik aamma piginnittuusoq, Sermitsiaq.AG-mut oqarpoq.

Namminersorlutik Oqartussat paasissutissiarisimavat, arfininngornermi Kunngit Pingasut Ullorissammagu imernitarfiit tallimanngornermi nalunaaqutaq 00.00 matuneqassasut.

Jim Riis-ip unnugu inuit amerlanissaat naatsorsuutiginngilaa.

- Inuit nalunaaqutaq 00.30 - 02.00 nalaaniileraanga naliginnaasumik takkuttarput, taamaattumik unnugu inuit amerlasuut imerniartarfiliarnissaat naatsorsuutiginngilara. Illoqarfimmilu nuannattoqarsinnaanera ilimanaateqarsinnaavoq, taanna oqarpoq.

Atuaruk: Sulisitsisut: Neriniartarfiit siusissukkut matutinneqarnissaat inatsisinik unioqqutitsineruvoq

Imerniartarfiit ajortuliorfigittut

Jim Riis-ip oqaatigaa, imerniartarfiit ajornanngippallaamik pisuutinneqartartut, taanna naapertorlugu, Kalaallit Nunaanni imigassamik ajornartorsiuteqarnermut imerniartarfiit pisuussuteqanngillat.

- Imerniartarfiit ajortuliorfiginerisigut inuit imigassamik ajornartorsiutaarutsinneqarsinnaanerat, eqqarsarluannginneruvoq. Imerniartarfiit inunnut pinngitsaaliillutik imigassartoqqusineq ajorput. Ukiuni 15-ini imigassartunnginnerulersimanerput uppernarsarsimavarput. Tamanna sunngiffimmi akisussaassuseqarnermik tunngaveqarpoq. Inuttut inerikkiartorlutalu pitsanngoriartorpugut. Taannalu takkuppoq (Agathe Fontain, aaqq.) aserorterillunilu. Meeraavallaarnerarpaatigut namminerlu aalajangiisuussaalluni oqaatigalugu, taanna tikkuaavoq.

- Agathe Fontainip Kalaallit Nunaat momon-inngortinniarmagu ernumassutigaara, taanna erseqqissaavoq.

Atuaruk: Imerniartarfiit tallimanngornermi matujaassasut

Namminersorlutik Oqartussanut unammillerusunngitsoq

Namminersorlutik Oqartussanut taarsiivigineqarnissamik piumasaqarniarpit?

- Naamik, taamaaliornermi ajugaassutigineqanngisaannarpoq. Kisianni unnugu 30.000-niit 50.000 koruniit tungaannut aannaasaqarfigissavarput. Taarsiiffigitinnissamik piumasaqarnissaq eqqarsaatigingunanngilarput. Namminersorlutimmi Oqartussat oqaatigissavaat inatsisit malissagivut. Tamanna nukinnik atuiffiginianngilara. Sulitsisulli oqaatigisimasaattut ataatsimoorussamik eqqartuussisunut suliassanngortitsisoqassappat peqataanissarput nalunaarutigisinnaavarput. Namminersortutulli suliffeqarfittut Namminersorlutik Oqartussat unammilleraluaraanni ukiup tulliani ajorneruliinnassaaq, taakkua tassani nutaaliorsinnaagamik, akunnittarfimmi pisortaa oqarpoq.

Nuummi suliffeqarfik taarsiivigitinnissamik piumasaqarniartoq

Sermitsiaq.AG-p Heca Nuuk A/S-mi pisortaaneq, Nuummi imerniartarfinnik arlalinnik ingerlaqartoq, attavigisimavaa.
Suliffeqarfiup sapaatip-akunnerata naanerani tusarnaatitsinissaagaluit marluk taamaatissimavai, Namminersorlutillu Oqartussat eqqartuussisulersuunneqarnissaannik misissuillutik.

- Eqqartuussisunut suliakkiinissaq misissorparput. Uani Naalakkersuisoq aamma akisussaaffeqartariaqarpoq. Ulloq 23. december 2017-imi pisumut atatillugu aamma misissuivugut, tassani assigusumik pisoqarpoq tassanilu tusarnaartitsinissat taamaatinneqarnerinik tunisaqannginnerullu kingunerisaanik 250.000 koruunit missaanni annaasaqaatigisimallutigit. Sulisitsisut suliamut suliniuteqartut aamma ilisimavara, pineqartummi arlallit kingunerluuteqartussaapput, taanna oqarpoq.

Nikolai J. Nissenip ilanngullu paasissutissiaraa, sapaatip-akunnera naanera sioqqullugu suliffeqarfik januarip qaammataani 200.000 koruunit missaanni sipaarutissanik nassaarniassasoq.

Aqagu arfininngornermi pisiniarfinni imigassanik aamma tuniniaasoqassanngilaq.

Powered by Labrador CMS