imigassamut inatsit
Imerniartarfinni sulisut pikkorissartinneqassapput
Inuit imigassamik tuniniaanermik sassaalliinermilluunniit suliallit, suliffitsik pigiinnarusukkunikkit pikkorissartariaqalerput.
Tamanna imigassamut inatsissami qaammatip nikinnerani atuutilertussami piumasaqaatinut ilaavoq, pikkorissarnerillu internettikkut ingerlanneqarsinnaavoq, atugassallu ulloq 15. februarimiit piareerneqarsimassasut, peqqissutsimut naalakkersuisoqarfik paasissutissiivoq.
Unnuaanera toqqissisimanartoq
- Imigassaq pillugu inatsisip nutaap ilaatigut nassatarissavaa imigassanik aalakoornartortalinnik tuniniaanermik sassaallertarnermilluunniit suliaqartut akisussaassuseqartumik nioqquteqarnissamut sassaallernissamullu pikkorissartinneqassammata. Sulisut taama ilinniartinneqarnissaannik piumasaqaateqarnermi tunngavigineqartoq tassaavoq imigassamik aalakoornartortalimmik atornerluinerup pitsaaliorneqarnerata nukittorsarneqarnissaanik aammalu unnuaanerani pissutsit toqqissisimanartuunissaannik Naalakkersuisut kissaateqarnerat, Peqqissutsimut Naalakkersuisoq, Agathe Fontain tusagassiuutinut nalunaarummi oqarpoq.
Ulloq 15. februar pikkorissartitsineq pillugu nittartagaq iserfigineqarsinnaalissaaq aammalu atuisut peqataaniarlutik nalunaartut pikkorissarnerit pillugit iserfissanik nassinneqarsinnaalissapput.
Akisussaaffik
Sulisut imigassanik aalakoornartortalinnik tuniniaanermik sassaallertarnermilluunniit suliaqartut akisussaassuseqartumik sassaallernermik tuniniaanermilluunniit pikkorissarnerni peqataasimanissaa akuersissummik pigisaqartut akisussaaffigaat. Nakkutilliiartortoqartillugu sassaallerfiusartoq nioqquteqarfiusorluunniit sulisut pikkorissarsimanerannut uppernarsaammik takutitsisinnaassapput, naalakkersuisoqarfiup tusagassiuutinut nalunaarutaani allassimavoq.