Suliffeqarfiit

Imerniartarfiit tapiiffigineqarneri ileqqorissaarnerua?

Qallunaat ineriartortitsinissamut aningaasaliisarfia Nuummi imerniartarfinnut toqqaannanngitsumik aningaasaliivoq. Suna ajunnginneranik ajortuuneranilluunniit aalajangiisussaanngilagut, pisortaq oqarpoq

Danskit naalagaaffiata aningaasaateqarfiata kalaallit suliffeqarfiutaat toqqaannanngitsumik aningaasanik atukkerpaa, taassuma imigassat aalakoornartortalinnik tuniniaaneq isertitaqassutiginerpaasarpaa

Danmarkimi naalagaaffiup aningaasaateqarfia Vækstfonden oqaluttuarisaanermut ilannguttumik aningaasaleeqataavoq. Taanna siullermeerluni kalaallit ingerlatseqatigiiffianut millioninik arlalinnik atortitsissalluni aalajangernikuuvoq.

Aningaasat qanoq amerlatiginerat saqqummiunneqarnikuunngilaq, tigusisullu aamma oqaatigiumanngilaa.

Danmarkimi naalagaaffiup aningaasaateqarfiata suliffeqarfiit pitsanngorsarnissaat, niuerfiilu annertusinissaannik ikiornissaat, nioqqutaat nutarternissaat imaluunniit suliffiit nutaat aallartinnissaat suliarisarpaat.

Vækstfondenilu aamma Kalaallit Nunaanni maanna pisortaq Christian Motzfeldt naapertorlugu taamaaliorniarpoq. Ikiuineq aningaaserivinni atugassarititanit allaanerusumik aningaasanik atortitsinikkut pivoq.

Imerniartarfiit takornariarnermut tunngatinneqartut
Kalaallit inuussutissarsiorneranni aningaasaateqarfiup immikkoortut pingasut soqutigisarai; takornariaqarneq, aatsitassat aamma aalisarneq. Aningaasaateqarfiup aningaasaliinera siulleq Public Demand Acencymut Nicolai Jacobsen Nissenimit siuttuuffigineqartumut tupput.

Vækstfondenimit aamma Grønlandsbankenimit atornikkut Public Demand Agencyp suliffeqarfimmi Heca Nuuk A/S-imi aktiaatit annerpaartaat pisiarisinnaasimavai.

Hecami gruppip Nuummi imerniartarfiit qulinit ikinnerunngitsut Kristenemut, Manhattan aammalu Godthaab Bryghus ingerlatarai - tassa illoqarfiit pingaarnersaata aliikkusersuinermut aamma neriniartarfeqarnermut suliffeqarfiisa amerlanerpaartaat.

Imigassamik atornerluineq nassuerutigigaa
Qallunaat inuussutissarsiornermut aviisiata Børsenip, Christian Motzfeldt, Vækstfondenimi pisortaq, aningaasanik Heca Nuuk A/S-imut, annerpaamik atuisut immiaaqqanik aalakoornartunillu allanik imerusussusaannik isertitaqartumut atortitsinermigut ileqqorissaarnerup tungaatigut isiginninneq apeqqutigaa.

- Ileqqorissaarnermut tunngasortaat isiginiartuaannarparput. Nassuerutigaarput atornerluinikkut ajornartorsiortoqartoq. Kisianni uagut suna ajortuuneranik ajunnginneranilluunniit aalajangiisussaanngilagut, taanna qallunaat aviisiannut oqarpoq.

Ileqqorissaarnermut isiginninneq
Pisortap Christian Motzfeldtip Vækstfondenip ilanngunnera, aningaasaateqarfiup Heca Nuuk A/S takornariaqarnermut suliaqaqataasutut nalilermagu tulluartuutippaa.

- Heca suliffeqarfittut takornariaqarnermut tunngasutut pitsaasutut isigaarput. Assersuutigalugu Danmarkimi immiorfeeqqamik suliffeqarfiliornissamik pitsaasumik pilersaarutilimmik aggertoqarpat aamma misissussagaluarparput, aningaasaateqarfiup pisortaa, Christian Motzfeldt aviisimut ullormut saqqummertartumut Børsenimut oqarpoq.

Allaaserisaq tamaat uani atuaruk: Vækstfonden skruer op for blusset i Grønland

Powered by Labrador CMS