Imermut tunngatillugu kanngunartuliaq allamut sangutitsisoq
Uummannami imeqarfimmit imeq suli imerneqarsinnaanngilaq. Avatangiisinut oqartussat ilisimatitsissutigisimavaat imeq imerneqarnissamut akuerisaajunnaartoq
Uummanami imeq mingutsinneqarsimasoq pillugu suliaq kusanaalligaluttuinnarpoq, oqartussammi innuttaasunut nalunaarutigisartagaat ullormiit ullormut allanngortarput.
Nukissiorfiit sapaatiummat nalunaarutigaat, imeqarfimmi imeq imerneqaqqissinnaalersoq. Nalunaarut taanna imermik pilersuisut maanna tunuartippaat.
- Avatangiisinut oqartussat misissukkat inerneri tunngavigalugit nalunaarutigissavaat, imeqarfimmi imeq imerneqartussamut akuerisaajunnaartoq, Nukissiorfiit tusagassiorfinnut nalunaaruteqarnerminni allapput.
Tamatuma saniatigut innuttaasut kuffimmiit imaluunniit tankimiit imermik atuinissaat killilersorneqarpoq.
- Pinngortitamut Avatangiisinullu Naalakkersuisoqarfik nalunaarpoq: Innuttaasut erngup aqqutaanik imermullu tankimik nammineq pigisaminnik atuisut, imeq taamaallaat perusuersartarfiup kuutsinneqarneranut assannillu errortornermut maannamut atorsinnaavaat, tassa uffarnermut, eqqiaanermut erruinermullu maanna atorneqaqqusaajunnaarpoq, Nukissiorfiit eqqiaasarnerminnik annertusaasimasoq allappoq.
Tuppallersaataavallaanngitsoq
Nukissiorfiit inissisimaffik nutaaq pillugu aalisakkerivinnik oqaloqateqarput, nutaamillu aaqqiissutissarsiorluni sulisoqartoq, Nukissiorfinnit ilisimatitsissutigineqarpoq.
Tuppallersaataavallaarunanngitsoq tusagassiorfinnut nalunaarummut ilanngunneqarsimavoq, tassalu imermik pilersuisut innuttaasunut paasissutissiissutigisimavaat, imermik pilersuinermut atatillugu allannguuteqartoqassanngitsoq.
- Innuttaasut imermik imerneqartussamik minguitsumik ajornartoornermi pilersuiffiusunut qulingiluaasunut suli aallersinnaapput, taakkua illoqarfik tamakkerlugu assigiinngitsuni inissisimapput, atuarfik aamma utoqqaat illuat ilanngullugit.