Imermik tunisassiortoq Kinamut angalaneq pillugu: Assigiinngisitsineq quarsaarutigaat
Danmarkimi imermik tunisassiortoq pilersinneqaqqammersoq Inland Ice Inuussutissarsiornermut Naalakkersuisoqarfiup Kinami qanittukkut nittarsaassineranut peqataavoq. Kisianni ingerlatseqatigiiffik taannarpiaq peqataanissamut sooq toqqarneqarpa, imermik tunisassiornermi unammillerti aperivoq, naalakkersuisoqarfiullu suliffeqarfinnik immikkoortitsinera eqqumiigineqarluni. Sermitsiaq taama allaatigisaqarpoq.
Suliffeqarfiit Inuussutissarsiornermut Naalakkersuisoqarfiup Kinami nittarsaassinissaanut peqataanissamut qaaqquneqarsimasut ilaat tassaavoq Danmarkimi imermik tunisassiorfik Inland Ice, 2017-imi Thomas Vildersbøllimit pilersinneqartoq. Ingerlatseqatigiiffik Aarhusip ilaani Risskovimi aallaaveqartoq, anpartsselskabimik Nuummi Nuna Advokaterini aamma nalunaarsuisitsisimavoq. Ingerlatseqatigiiffiup nammineq oqarnerat tunngavigalugu imermik aatsaat 2018-imi tunisassiulerpoq.
Aviisi Sermitsiaq taama allappoq.
Imermik tunisassiorfimmi unammillertaasumi Greenland Ice Cap Watersimi pisortap Peder Pedersenip eqqumiigaa, sooq Danmarkimi imermik tunisassiorfik pilersinneqaqqammersoq Kinami nittarsaassinissamut peqataanissamut qaaqquneqarsimanersoq, nammineq ingerlatseqatigiiffiutini 2009-mi Kalaallit Nunaanni pilersinneqarsimasoq inuussutissarsiornermut naalakkersuisoqarfiup Kinamut angalaneranut peqataanissamut qaaqquneqanngisaannarsimammat.
- Oqartariaqarpunga suliffeqarfinnik taamatut immikkoortitsisoqarnera quarsaarutigigakku, tupaallaatiginaguli. Kisianni uanga imminut sinnerlunga aningaasaliisukkalu sinnerlugit uukapaatinneqartutut misigisimavunga, unammillertitsinnik taamatut qaaqqusisimammata taamaalillutillu Kinami niuerfinnut appakaannissaannut ikiuullutik.
Greenland Ice Cap Waters Kalaallit Nunaanni ingerlatseqatigiiffiuvoq Ilulissani aallaaveqartoq, tassanilu sermimik agguisoqartarluni containerinullu tankinut immiussisoqartarluni Aalborgimut assartorneqartartunik tassanngaanniit Ribemi maqitsivimmut Framimut ingerlateqqinneqartarlutik.
Inuussutissarsiornermut naalakkersuisoqarfiup Sermitsiamut ilisimatitsissutigaa, Inland Icep qaaqquneqarneranut suliamut tunngasut pissutaasut. Ingerlatseqatigiiffimmi suleriaaseqarneq nutaaq tunngavigalugu, sumiiffimmik siunissami neqeroorutigineqartussanut assigusumut, nalunaarsorneqarsimasumut qanittukkut neqerooruteqarlunilu akuersissuteqarfigineqarsimavoq.
Kinami suliffeqarfinnik nittarsaassinermi nutaanik neqeroorutissanik neqerooruteqartoqarnera pissutigalugu inuussutissarsiornermut suliffeqarnermullu naalakkersuisoq, Aqqalu Jerimiassen (A), inatsisartuni tatiginnikkunnaarnermik sapaatip akunnerani matumani taasititsissutigineqarpoq. Sermermi imerlu pillugit inatsisissatut siunnersuut marlunngormat aatsaat aappassaaneerneqarluni oqaluuserineqarpoq, taamaammat Partii Naleraq isumaqarpoq naalakkersuisoq piginnaatinneqarani neqeroorutissanik saqqummiussisimasoq.
Aviisimi Sermitsiami nutaami allaatigineqartoq tamakkerlugu atuarsinnaavat.