Imermik nukissiorfik rekortiliisoq
Ilulissani imermik nukissiorfik 2022-mi aatsaat taama annertutigisumik innaallagissamik nioqqutissiorpoq, tamannalu ilaatigut Ilulissat alliartornerani atuisut amerlanerulernerannik pissuteqarpoq, Nukissiorfiit ilisimatitsipput.
Paakitsumik imermik nukissiorfik 2022-mi tunisassiorluarpoq, tassa Ilulissani atuisunut innaallagissamik 76,806 GWh-nik tunisaqarpoq
Nukissiorfiit nittartakkaminni taama ilisimatitsipput.
2021-mut sanilliullugu nukissiorfik 72,503 GWh-inik nioqqutissiorpoq.
2022-mi ukiuunerani ississimasoq, Nukissiorfiit oqaluttuarput, aamma innaallagissamik qaminneqarsinnaasumik kiassaatinik arlalinnik ikkussuisoqarsimavoq, innaallagissamillu atuisoqarnerulerneranut taakku pissutaaqataapput.
Imeqarluartoq
Ilulissat inuttusiartuinnarnerat nioqqutissiornerulernermut pissutaasut ilagaat, Nukissiorfiillu taamaalillutik atuisoqarnerulerput. Naatsorsueqqissaartarfik naapertorlugu Ilulissat ukiuni sisamani kingullerni 200-nik inoqarnerulersimavoq, 2022-milu illoqarfimmi innuttaasut 4.737-upput.
Imermik nukissiorfiup Nuummi pilersuisup akerlianik Paakitsumi imermik nukissiorfik imermik amigaateqanngilaq:
- Imeq tatsineersoq Paakitsoq Imermit Nukissiorfimmit pilersuisoq tassaaneruvoq sermersuup aakkiartorneraneersoq. Taamaattumik tamaani, ajoraluartumik imeq naammattorsuaq pigineqarpoq, taamatuttaaq aamma ilimanaateqarpoq siunissami Ilulissat alliartornerat aammattaaq innaallagissamik kiassaanermik qaminneqarsinnaasumik suli annertusiartortitsineq matussuserneqarsinnaalluarluni, Nukissiorfiit allapput.