Imermik misiliutit ilanngaaserisunit unitsinneqartut
Nuummi erngup pitsaassusaanik misiliutit, erngup naggorissaammik akoqaratarsinnaaneranik misissuutaasussat, ilanngaaserisunit misissugassanngorlugit tiguneqarsimangamik kinguaattooqqapput. Naalakkersuisoqarfiup misiliutinit sapaatip akunnerata tulliani akissutisinissani naatsorsuutigaa.
Nuummi erngup naggorissaatinik mingutsinneqaratarsinnaaneranik paasisaqarfiusussat misissungassanngortillugit nassiunneqaramik maanna kinguaattoorput. Erngup pitsaassusaanut misissugassanngorlugit tigusat ilanngaaserisunit taamungaannaq tigusatut misiligarneqartussatut tiguneqarsimapput.
Nunalerinermut, Imminut pilersornermut, Nukissiuuteqarnermut Avatangiisinullu Naalakkersuisoqarfimmi pisortaq, Mette Skarregaard Pedersen Sermitsiaq.AG-mut ilisimatitsivoq.
- Erngup pitsaassusaanut misissuutissat marlunngorlugit katersorneqarsimapput, Danmarkimullu misissuisarfinnut assigiinngitsunut marlunnut nassiunneqarlutik. Misissugassalli maanna kinguaattoorput, ilanngaaserisunit misissugassanngorlugit tiguneqarsimammata, naalakkersuisoqarfimmi pisortaq Sermitsiaq.AG-mut ilisimatitsivoq.
Misissugassat ilanngaaserisuni misissorneqareerlutik maanna nassiunneqarfimminnut ingerlateqqinneqareerput. Misissugassaq siulleq misissuivimmut apuussimalerpoq, misissuinerlu aallartinneqarsimalerluni.
Eqqumiitsumik nassaartoqartoq
Nuummi erngup pitsaassusaata nalinginnaasumik misissorneqarnerani 25. februar eqqumiitsumik nassaartoqarpoq.
Nunalerinermi naggorissaatit 1,2,4-triazolimik taaneqartartut sinnikui imermi 1 literimik annertussuseqartillugu pesticide-nik 0,22 og 0,71 mikrogramminik akorineqartoq paasineqarpoq. Erngup pitsaassusaanik misissugassat Nuummi imeqarfinni marlunni, illoqarfimmut pilersuisuusuni tiguneqarsimapput.
Naggorissaatip 1,2,4-triazol imermi 1 liiterimik annertussuseqartumi annerpaamik 0,1 mikrogramiusassasoq Danmarkimi killilerneqarsimavoq.
Nunatta Nakorsaaneqarfiata erngup tissalukaarutit akuisa sinnikuinik akoqalaarnera peqqinnissamut ulorianarsorinngikkaluaraa, taamaattoq avatangiisinut Naalakkersuisoq Kalistat Lund ernumassuteqarluni Sermitsiaq.AG-mut oqarpoq.
Pesticidimmi nassaarineqartut nunatsinni atorneqarneq ajorput.
- Tamanna ernumanartupilussuartut isigaara. Taamatullu ittunik qaqutigoortupilussuarmik nassaartoqarnera soorunami tupaallaatigaarput. Isumaqarpungalu mingutsitsinermi aallaaviusoq itisiliiffigalugu misissorneqassasoq, nassaartoqarneranut tunngatillugu Kalistat Lund Sermitsiaq.AG-mut oqarpoq.
Sapaatip akunnera tulleq akissutisissasut
Naalakkersuisoqarfimmi pisortaq Mette Skarregaard Pedersen Sermitsiaq.AG-mut ilisimatitsivoq misissugassat siulliit Danmarkimi misissuisarfimmut siullermut tikiunneqarsimalersut, misissuinerillu aallartinneqarsimasut. Nassiussap tullia kingusinnerpaamik ullumi apuutissasoq naatsorsuutigineqarpoq.
- Piaartumik misissuisoqarnissaa qinnutiginikuuarput. Piaartumik misissuinerit ullut pingasut ingerlanneqartarput. Sapaatip akunnera tulleq akissutisereersimanissarput naatsorsuutigaarput. Suliaq pingaarnerpaatut inissisimavoq, Mette Skarregaard Pedersen Sermitsiaq.AG-mut oqarpoq.
