Imermik avammut nioqquteqalernissaq soqutigineqarluarpoq
Imermik sermimillu akuersissuteqarfissat nutaat maanna tamanut saqqummiunneqarput. Ingerlatseqatigiiffiit nunatsinneersut nunat tamalaat akornanni siammarterisartunik peqateqarnissaat siunnerfigineqarpoq, naalakkersuisoq, maanna Europami niuernikkut nittarsaasseqataasoq, oqarpoq.
Naalakkersuisut Kalaallit Nunaata kitaani sumiiffinni tallimani imermik sermimik aningaasarsiutigalugu iluaquteqarfissanut nutaanut pisinnaatitsissutit qinnutiginissaannut ingerlatseqatigiiffinnut nunatsinneersunut nunanillu tamalaaneersunut qinnuteqaqqusipput.
Sermitsiaq allappoq.
Sumiiffiit pineqartut sapaatip-akunnerani kingullermi isumasioqatigiinnermi, Inuussutissarsiornermut, Nukissiuuteqarnermut, Ilisimatusarnermut Suliffeqarnermullu Naalakkersuisup Jess Svanep peqataaffigisasani, tamanut saqqummiunneqarput.
– Københavnimi januaarip 17-iani isumasioqatigiinnermi ullup ingerlanerani 80-it angullugit peqataaffigineqartumi Kalaallit Nunaata sermianik ernganillu soqutiginninnerup taama annertutiginera misigalugu isumalluarnartorujussuuvoq, Jess Svane, Københavnimi isumasioqatigiinnissaq sioqqullugu Naalakkersuisoqarfik GEUS-ilu peqatigalugit pisinnaatitsissuteqarfinnik nutaanik Nuummi, Maniitsumi Qaqortumilu nittarsaassisoq, oqarpoq.
Jess Svane maannakkorpiaq Europami niuernermik nittarsaasseqataavoq:
– Ulluni makkunani Tysklandimi Frankrigimilu niuernermik nittarsaassisut angalaqatigiit amerlangaatsiarpugut, niuernikkullu nittarsaassinerit arlaqarnerusut ingerlanneqarnissaat soorunami sulissutigerusupparput, Jess Svane oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: