Imeq tissalukaarutit imaasa sinnikuinik akoqartoq: Tamanna ernumanarluinnarpoq
Nuummi imermi akuutissamik kemiiusumik, 1,2,4-triazol-imik taaguutilimmik nassaartoqarsimavoq. Akuutissat taamak annikitsigisut peqqissutsimut ulorianartorsiortitsinaviarunnanngikkaluartut, tamanna ernunamartoq, naalakkersuisoq isumaqarpoq.
Pingasunngornermi ulloq 23. februar 2022 misissuisoqarmat akuutissaq kemiiusoq, 1,2,4-triazol-imik taaguutilik Nuup imeqarfiani nassaarineqarsimavoq.
1,2,4-triazol nunalerinermi naatitat oqoqalernissaannut illersuutitut atorneqartartut imaasa sinnikuisa arroriartornerisigut pinngortarpoq. Aamma akuutissaq qalipaatip arroriartornerani pinngorsinnaavoq, Namminersorlutik Oqartussanit tusagassiorfinnut nalunaaruteqarnermi ilisimatitsissutigineqarpoq.
Nunatsinni nakorsaanerup Henrik L. Hansenip oqaatigaa, imermik imerneq peqqissutsimut ulorianartorsiortitsinngitsoq, taamaattumillu Nuummi innuttaasut toqqissillutik imermik imiinnartarsinnaasut.
Akuutissaq piffissami sivisuumi iiorarneqarnermini sunniutai tamakkiisumik ilisimaneqanngillat. Taamaammat avatangiisinut naalakkersuisup Kalistat Lundip sumiiffimmit akuutissanik taamatut ittunik atuiffiunngitsumi nassaartoqarnera ernumanartutut isigaa.
- Tamanna ernumanartupilussuartut isigaara. Taamatullu ittunik qaqutigoortupilussuarmik nassaartoqarnera soorunami tupaallaatigaarput. Isumaqarpungalu mingutsitsinermi aallaaviusoq itisiliiffigalugu misissorneqassasoq, Avatangiisinut Naalakkersuisoq Kalistat Lund Sermitsiaq.AG-mut oqarpoq.
Akuutissaq 1,2,4-triazol ilaatigut Europami nunalerinermi atorneqartarpoq. Nuummi imermi imerneqartussami taamatut ittumik nassaarneq qaqutigoortuuvoq, akuutissarmi pineqartoq Kalaallit Nunaanni atorneqartanngilaq.
Piffissaq ungasinnerusoq eqqarsaatigalugu peqqissutsimut ulorianartorsiortitsilersinnaasoq
Tatsit imeqarfiit marluk, Nuummut pilersuisuusut pineqarput. 23. februaari 2022-mi misissueqqissaarnerup inernerani takuneqarsinnaavoq, imeq 1 literimik annertussuseqaraangat pesticide-nik 0,22 og 0,71 mikrogramminik akoqartoq. Mingutsitsineq sumit pinngorsimanersoq suli ilisimaneqanngilaq.
Danmarkimi Europamilu imermut 1 literimik annertussuseqartumut 0,1 mikrogramimik akoqartoqarsinnaanera akuerisaavoq. Taamaalilluni Nuummi imeq akuutissamik 1,2,4-triazol-imik akoqartoq killissamik qaangiisimavoqt.
Henrik L. Hansenip Sermitsiaq.AG-mut ilisimatitsissutigaa, killiliisimanermi akuutissap qanoq toqunartoqartiginera pineqanngitsoq, mianersornissamilli tunngaveqarluni killiliussaq aalajangiunneqarsimasoq, erngup imerneqartussap akoruutissanik imaqannginnissaa kissaatigineqarmat. Akuutissaq 1,2,4-triazol nerisassat ilaanni aamma nassaassaasarpoq, akuutissaq nunalerinermi atorneqartarmat piffissamilu sivikitsumi iiorarneqarnerani ulorianartuunani, Nunatsinni Nakorsaaneq erseqqissaavoq.
- Ilisimanngisarput tassaavoq, akuutissamik inuuneq naallugu iioraasimanermi qanoq kinguneqartoqarsinnaanersoq, taamaammat imermi imerneqartussami soorunam tamanna akuusussaanngilaq, Henrik L. Hansen oqarpoq.
Naalakkersuisup erseqqissaassutigaa, ajornartorsiut aaqqiiffiginiarlugu misissueqqissaarnerit aallartinneqarsimasut.
- Akuutissap keemiskiusup piffissami sivisuumi iiorarneqartarnera peqqissutsimut ulorianarsinnaammat maannakkut nalunaaruteqarpugut. Imermi imigassatsinni tissalukaarutit imaasa sinnikuinik allanilluunniit mingutsitsisinnaasunik akoqartoqassanngilaq, taamaammat maanna tamanna nalunaarutigaarput misissuinerillu aallartillugit, Kalistat Lund oqarpoq.
Misissuinerit ingerlanneqartut
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik Nukissiorfiit peqatigalugit misissuinermik aallartitsisimavoq. Imermit misissugassanik aamma tigusisoqarsimavoq. Misissueqqissaarnermit akissutit sapaatip-akunnerisa pingasut sisamallu qaangiunneranni Naalakkersuisunit tiguneqassaspput. Misissueqqissaarnerup takutissavaa kukkusoqarsimanersoq imaluunniit Nuummi imeq ilumut akuutissamik 1,2,4-triazol-imik akoqarnersoq.
- Neriuutigaara imermit misissugassatut tiguneqarsimasut tulliisa takutikkumaaraat kukkusoqarsimasoq aamma imeq imerneqartussaq minguitsuusoq. Misissueqqissaarnerilli takutippassuk, tissalukaarutit imaasa sinnikuinik akoqartoq, imermi imigassami akuisa minnerpaaffianiitinneqarnissaat sulissutigissavarput, Avatangiisinut Naalakkersuisoq Kalistat Lund Sermitsiaq.AG-mut oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...