Imeq pillugu kanngunartuliaq: Krusep piumasaraa, Uummannami umiarsuarmik tunitsiviliisoqarnissaa
Siumumit Naalakkersuisut kaammattorneqarput, umiarsuarmik tunitsivissamik piaarnerpaamik Uummannamukartitseqqullugit
Uummannami erngup mingutsinneqarnerata kinguneranik illoqarfimmi aalisakkeriviit marluk, Royal Greenlandimit aamma Avanaa Seafoodimit pigineqartut, tunitsivigineqarsinnaanerat tunisassiornerallu unilluinnarsimapput. Tamatuma malitsigisaanik, Uummannami KNAPP umiarsuarmik tunitsiviusussamik tikisitsisoqarnissaanik kissaateqarsimavoq. Tamanna tunngavigalugu Siumumit piumasarineqarpoq, ingerlatseqatigiiffiit Namminersorlutik Oqartussanit pigineqartut umiarsuarmik tunitsiviliissasut.
- Aalisarnermi aningaasarpassuit annaaneqareerput, aaqqiissuteqartoqarnissaanullu piffissaq suli sivisuumik ingerlasinnaaovq. Saattuni aamma tunisassiorfik iluarsaanneqartussaagami matoqqavoq, taamaammat tunitsivissamik ingerlaannaq umiarsualiinissaq pissutissaqarluarpoq, Siumumi ilaasortaq Karl-Kristian Kruse tusagassiorfinnut nalunaaruteqarnermi taamak oqarpoq.
Sapaatiummat tusarliunneqarpoq, imeqarfimmi imeq mingoqarunnaarsimasoq, kiisalu biili imermik assartuut atorlugu aalisakkeriviit imermik pilersorneqarnissaat sulissutigineqartoq. Ippassaq ataasinngornermi imeq suli mingoqartoq paasineqarmat, imermik pilersueqqilernissamut akuersissut tunuartinneqarsimavoq.
- Tunisassiornissamut Nukissiorfiit imermik ammaaqqinnissaat utaqqineqartariaqanngilaq, tassa imeq imerneqarsinnaananilu mingoqarami tunisassiornermut atorneqarsinnaanngilluinnarpoq, Karl-Kristian Kruse isumaqarpoq.
- Aningaasarpassuit annaaneqareerput, utaqqeqqinnissatsinnut akissaqanngilagut.
- Inuussutissarsiornermut Naalakkersuisoq kaammattorusuppara, piaarnerpaamik Uummannamukaqqullugu.