Imartami ilisimanngisami angalaneq
Inuit Circumpolar Council, ICC, Ruslandip Ukrainemik saassussinerata kingorna “imartami immap assiliorneqanngitsumi” inissisimavoq, tassa nunani ilaasortaasuni sisamaasuni Inuit suleqatigiinnerat manna tikillugu ilisimasimanngisat atorlugit ingerlanneqartariaqarmat. Kattuffiup inuit Kangianiittut aamma Kitaaniittut sinniisuuffigai taamaattumillu mianersorluinnartumik ingerlasariaqarpoq, ICC siulittaasortaava, Sara Olsvig oqarpoq.
Sara Olsvigip ukiunut sisamanut qinigaasup qularinngilluinnarpaa unamminartoq annertunerpaaq sunaassanersoq:
- Soorunami Inuit akornanni ataatsimoornerup atuutiinnarnissaa ingerlatikkusupparput naak Europami sorsuttoqaraluartoq, aamma imarluttumi maannakkut pisumi aqqutissarsiorluta, oqarpoq.
Aviisi AG taama allappoq.
- Aap inissisimaneq ajornakusoorpoq.
Maannakkorpiaq ICC-ip umiarsuaani aquttunngoqqammerpoq “ataatsimeersuarnermi immikkut ittumi” soorlu nammineq oqaatigigaa, ingerlanneqartumik. Corona pissutigalugu annertunersaa internetikkut ingerlanneqarpoq, tassa peqataasut tikillutik ataatsimoornatik.
Ataatsimeersuarnerup taamatut ingerlanneqarnissaa januaarimili aalajangerneqarpoq, tassa Ruslandip Ukrainemik saassusinera sioqqullugu. Kisianni paasinarsivoq tamanna ajunngiinnartoq – corana-virusip siaruarnissaata pinngitsoortinnerata saniatigut – tassa Inuit Ruslandip kangiatungaaneersut, Tjukotkameersut, ajornartorsiutitaqanngitsumik peqataasinnaammata.
Tjukotkamut angalalluni tikissinnaaneq aamma aallarsinnaaneq pillugu qanoq ittoqarnera maannakkorpiaq nalunarpoq:
- Periarfissanik maannakkorpiaq misissuisimanngilagut, siulittaasunngortoq oqarpoq.
Aviisimi AG-mi atuarnerusinnaavutit. Aviisi uani pissarsiariuk: