Imarpik qulaallugu bilitsit utertinneqarsinnaannginnerat maanna allanngortinneqarpoq
Ilaasussanut corona pissutigalugu nunamiit aallarnissaminnik taamaatitsiinnarusuttunut nutaarsiassatsialaqarpoq. Air Greenlandimmi maanna imarpik qulaallugu bilitsit allanngortinneqarsinnaalersippai imaluunniit akii utertissinnaalerpai.
Air Greenlandip bilitsinik allanngortinneqarsinnaanngitsunik akikinnerusunillu allanngortitsinissamik akiinillu utertitsinissamik ammaanerminut pissutaasoq, sullitat covid-19-imut atatillugu imikkorluinnaq inissisimanerat. Ingerlatseqatigiiffik tusagassiorfinnut nalunaaruteqarnermi ilisimatitsivoq.
- Takusinnaavarput inuppassuit covid-19 pissutigalugu inissisimanerat ajortoq, tamannallu paasilluarsinnaavarput. Taamaammat nuannaarutigaara, imarpik qulaalllugu timmisartuussisarnitta ingerlatiinnarnissaanik Namminersorlutik Oqartussanik isumaqatigiissuteqaratta, Air Greenlandimi pisortaaneq Jacob Nitter Sørensen oqarpoq.
Namminersorlutik Oqartussat inissanik pisiaqartut
Namminersorlutik Oqartussanut isumaqatigiissuteqarfigineqarpoq, timmisartumi inissanik pisiaqartarnissaat, Air Greenlandi timmisartoq ulikkaarlugu ilaasoqartarani, arlaleriarluni timmisartuussisarnermini aningaasartuutit ilaannut matussutissaqartinniarlugu.
- Niuernermi tunngavitsinnut tamanna qulakkeerinneqataassaaq, tamannalu tunngavigalugu sullitatta imarpik qulaallugu bilitsiminnik allannguerusunnerat utertitsivigineqarusunnerallu naammassisinnaalerparput, pisortaaneq oqarpoq.
Juunimiit pingasoriarluni aallartoqartassasoq
Periarfissat allanngormata, Air Greenlandip naatsorsuutigaa angalasarnerit allaanerulissasut, taamaammallu angallassisarnissamut pilersaarutit allanngortissimallugit. Tassa junnip aallaqqaataaniit sapaatip akunnerut minnerpaamik pingasoriarluni aallartoqartassaaq, marlunngornikkut, sisamanngornikkut tallimanngornikkullu.
Bilitsit allanngortinneqarsinnaanngitsut junnip aallaqqaataaniit aggustusip 31-ata tungaanut utertinneqarsinnaalissapput imaluunniit ullormut allamut allanngortinneqarsinnaalissapput. Atlantikoq qulaallugu timmisartornissamut bilitsit novembarip 30-ata tungaanut atuuttut, aqqut allanngortinnagu, allanngortinneqarsinnaapput, Air Greenland ilisimatsitsivoq.
Imarpik qulaallugu bilitsit allanngortinneqarsinnaanngitsut, tallimanngorneq maajip 22-at aallarnerfigalugu allanngortinneqarsinnanngussapput utertinneqarsinnaanngorlutilluunniit.