IMAK: Sulinermi atukkat iliuuseqarfigineqarlik
Kalaallit Nunaanni Iliniartitsisut Kattuffiata IMAK-ip klassimi ataatsimi atuartut amerlassusaat ikilisinniarlugit, Meeqqat atuarfianni sulisussarsiortarnermi ajornartorsiutit aaqqiiffigeqquai. Ilinniartitsisut, atuartut angajoqqaallu coronap atuunnerani misigisimasaannut taakku tapersersuipput.
Sermitsiaq.AG-mit ilinniartitsisut, atuartut angajoqqaallu coronap nalaani pitsaasumik misigisaqarsimanerat pillugu ilanngutassiat arlallit saqqummiunneqareersut, Ilinniartitaanermut, Kultureqarnermut Ilageeqarnermullu Naalakkersuisup Ane Lone Baggerip oqaatigaa, klassimi ataatsimi atuartorpassuusarnerannik ajornartorsiut imaaliinnaq aaqqiiffigineqarsinnaanngitsoq.
Sulisussaqarniarneq suli apeqqutaavoq, taanna erseqqissaavoq. Kalaallit Nunaanni ilinniartitsisut kattuffiata IMAK-p siornatigut oqaatigisimasani uteqqippai. Ilinniartitsisut sulinerminni atugaat oqimaappallaaqaat. Amerlanerit ilinniartitsisunngorulissappata aamma ilinniartitsisutut ilinniagallit meeqqat atuarfiat alarlugu allamut suliffissarsiussanngippata ajornartorsiut iliuuseqarfigineqartariaqarpoq.
- IMAK-imi siulittaasutut siulersuisullu sinnerlugit qularutigineqassanngilaq, meeqqat atuarfiat pillugu inatsimmi kap. 3 § 6-imi 26-nik atuartoqarsinnaanermik aalajangersakkap allanngortittariaqarnera oqaatiginikuuarput, IMAK-imi siulittaasoq Birthe Møller Therkildsen oqarpoq.
Taanna isumaqarpoq, sulisussarsiortarnermi aningaasaqarnikkullu unammilligassaasartut aaqqiiffigineqassappata oqaloqatigiinneq aqqutissaasoq.
Amerlasuut allanik suliffissarsiortartut
- Aningaasassaqartitsisoqannginnera tusartareernikuuarput. Ajornartorsiutit qanoq aaqqiiffigineqarsinnaanerat pillugu Ane Lone Baggeri oqaloqatigerusupparput. Ilinniartitsisut sulinermi atukkamikkut artorsartinneqartarput, amerliartuinnartullu sulinermi atukkat pissutigalugit ilinniagartik qimallugu allamut nuuttarput, siulittaasoq Sermitsiaq.AG-mut oqarpoq.
Siulittaasup oqaluttuaraa, IMAK maannakkorpiaq sineriammi angalasoq, isumaqatigiissutissallu pillugit isumaqatiginninniarnissamut ilaasortat piumasaqaataannik katersilluni. Tassunga atatillugu ilaatigut misigisarsimavaa, ilinniartitsisut sulinerminni sakkortuunik misigisaqartartut tarnip pissusaanik ilisimasalimmit oqaloqateqartarnissaannik kommunit ujartuisartut. IMAK-imi siulittaasup ilisimaarilluarpaa, klassimi atuartut ikinnerutinniarneqarnerat kisimi unammilligassaanngitsoq.
- Ilinniartitsisumut ataatsimut atuartut ikinnerit kisimi aaqqiissutaasinnaanngilaq. Atuarfimmi pitsaassuseq qaffanneqassappat, ilinniartitsisut naammattumik amerlassusillit ilinniartitsisuuginnassappata, maanna ilinniartitsisuusut ilinniagaqaqqittarnerat nangitsiviusumilluunniit ilinniagaqartarnerat pitsaanerulersinneqassappata, atuarfimmilu atortutigut atugassarititaasut pitsaanerulersinneqassappata arlalippassuit imminnut ataqatigiittussaapput, taanna oqarpoq.
Pitsaaqqutaasut oqaluttuarineqartassasut
Birthe Møller Therkildsen isumaqarpoq, sulinermi pitsaanerusumik atugassaqartitsineq suliffigissallugulu pilerinarninngortitsineq sulisussarsiornermi ajornartorsiutaasartunut aaqqiissutaasinnaasut.
-Klassini nuanniitsutut pisimasut kisiisa oqaluttuarisasanngilavut. Pitsassuarmik isumaqatigiissuteqarpugut, aningaasarsiat isumaqatigiissutitigullu atugassarititaasut ilinniartitsisunit imatut naammagittaalliuutigineqartanngillat, siulittaasoq oqarpoq.
IMAK tassaavoq ilinniartitsisut kattuffiat, Kalaallillu Nunaanni meeqqat atuarfianni ilinniartitsisunit 1000-inik amerlanerusunik ilaasortaqartoq.