IMAK: Meeqqat atuarfiannut nukissat amerlanerusut

Ilinniartitsisut tulliani isumaqatigiissuteqarnermi akissarsiaat annertuumik qaffanneqartariaqartut,ilinniartitsisut kattuffianni siulittaasoq, Elna Heilmann isumaqarpoq. Angajoqqaat aamma akisussaaffeqartinneqarnerussapput.

Meeqqat atuarfianni naammassinerup kingorna ilinniaqqikkusuttartut suli ikippallaarput. Piviusoq Kalaallit Nunaanni Aningaasaqarnermut Siunnersuisoqatigiit amerlasooriarlutik oqaatigisagaat, nalunaarusiamilu kingullermi aamma uteqqinneqartoq. Nammineq nammattumik aningaasaqarnermik pilersitsisoqassappat taanna ajornartorsiutaavoq.. Aviisi AG allappoq.

Aningaasaqarnermut siunnersuisoqatigiit ilinniartitaanikkut kingulerunnermik taavaat.
Ilinniarsimassuseq qaffassarneqassaaq. Suliffissaqarnermut aqqummik aamma inunnut
ataasiakkaanut nammineq pilersorsinnaanissamik qulakkeerinnissaaq. Sunniutit ilaqutariit
ilorrisimaarnerannut imminullu naleqartinnerannut pitsaasumik sunniuteqartussat.

- Pitsaanerusup tungaanut ingerlavugut, kisianni meeqqat atuarfiata kingorna ikippallaartut
ilinniaqqinneq ajornerat naammaginanngilaq, Elna Heilmann, ilinniartitsisut kattuffianni IMAK-imi siulittaasoq oqarpoq.

Amerlanerusut inuusuttut ilinniagaannik aallartitsisarnissamik suliassaq meeqqat atuarfiata
kivissimannginneranut, pissutaasut arlallit taassuma oqaatigai. Ilaatigut nunatsinni meeqqat
atuarfiata ataatsitut isigineqartarnera oqaatigaa, tamannalu kukkunerujussuusoq, taanna
isumaqarpoq.

Assigiinngissutsit

- Nunap suatungaani kommunimilu sorlermi atuarsimagaanni ilinniarsimassutsip qaffasissusaat annertuumik assigiinngillat. Sinerissami sumiiffinni amerlasuuni ilinniartitsisunik amigaateqarneq ajorluinnarpoq, atuartut ilinniarsimanngitsumit atuartinneqartarlutik. Atuartut periarfissaannik annertuumik assigiinngisitsisarpoq. Taamaammat ajornartorsiutip taassuma politikikkut qanoq aaqqinneqarsinnaanera isiginiarneqartariaqarpoq. Isumaga malillugu sunniutaasut amerlapput, Elna Heilmann oqarpoq.

Ilanngutassiaq tamaat aviisimi AG-mi sapaatip-akunnerani matumani saqqummersumi atuaruk. Ugguuna iserfigisinnaavat:

Powered by Labrador CMS