IMAK: Ilinniartitsisut coronap nalaani puigorneqarput
Coronap nalaani meeqqat atuarfiini ilinniartitsisut suleriaasiat annertunerusumik oqartussaniit ukkatarineqarnerunissaa IMAK-ip kissaatigaa. Covid-19 pillugu oqartussat killilersuutinik pilersitsisarput ilinniartitsisullu malinnaatinneqarnissaat puigorneqartarluni. Ilinniartitsisut ullut tamaasa atuartut, suleqatit angajoqqaallu naapittuartarpaat.
IMAK-imiit maluginiarneqarpoq qitiusumiit kommuniniillu covid-19-imik tuniluutsitsinaveersaarnermut atatillugu atuarfinnut qulaaniit peqqusinerit allannguinernik kinguneqartartut pisaqattaartut. Tamannalu ilinniartitsisuniit toqqissisimassutigineqanngitsoq kattuffimmut apuunneqartartut, IMAK-ip oqaatigaa.
Peqqinnissaqarfik oqilisaaffiginiarlugu Naalakkersuisut nunatta nakorsaaneqarfiatalu coronamut misissueriaaseq ataasinngormat januaarip 17-ani allanngortippaat. Taassuma saniatigut killilersuutit assigiinngitsut pilersinneqartarsimapput. Meeqqat atuarfiini tuniluunneq sumiiffinni assigiinngitsuni annertusaraluaqisoq killilersuutit ilinniartitsisut atugassarititaanut naapertuuneq ajortut, IMAK isumaqarpoq.
- Ulluni makkunani ilinniartitsisut ilisimasanngilaat suliartorunik “sumut miloriunneqassanerlutik” imaluunniit suliassatik suussanersut minnerunngitsumillu Covid 19-imik tunillanneqassanerlutik tunillaassanerlutilluunniit. Taamaattoqartillugu atuartut aamma toqqissisimannginnerat pilersarpoq. Illua`tungaani Namminersorlutik Oqartussani kommuninilu allaffeqarfinni sulisut angerlarsimaf-fimminniit sulitinneqartut, Elna Heilmann tusagassiuutinut taama nalunaaruteqarpoq.
Isumaqatigiissutit malinneqartariaqarput
Namminersorlutik Oqartussat kommunellu atuarfinnut inuiaqatigiinnullu killilersuinerat Elna Heilmannip paasisinnaavaa, kisianni isumaqatigiissutit malinneqartariaqartartut erseqqissaatigalugu.
- Isumaqatigiissutinik sinaakkutinillu avaqqutaarinerit pileraangata ilinniartitsisut toqqissisimajunnaartarput uippakajaalernissamullu qanittuararsuanngortarlutik.
- Kingumut kommunit kaammattorumavagut atuarfinni ilinniartitsisut oqartussaaqataatillugit sunniuteqaqataatillugillu allannguisarnerit aaqqissuuteqqullugit, soorlu tamanna IMAK-imiit kommuninut nunatsinni Covid19-ip ajornartorsiutaanerata aallarteqqaarsimalernerani april 2020-mi kaammattuutiginikuugipput, Elna Heilmann oqarpoq.
Namminersorlutik Oqartussaniit aaqqissuusineq pitsaanerusoq
Meeqqat akornanni tuniluunneq illoqarfinni assigiinngitsuni annertusimavoq. Tuniluunnerlu maanna nuna tamakkerlugu aqunneqarsinnaajunnaartutut oqartussaniit nalilerneqarpoq. PCR-test-it covid-19-ip annikinnerpaaffissaminiitinnissaanut iluaqutaajunnaarput. Kommunit IMAK-imiit piumaffigineqarnerisa saniatigut Namminersorlutik Oqartussat pitsaanerusumik aaqqissuinissaat IMAK-imit kissaatigineqarpoq.
- Namminersorlutik Oqartussanit Covid 19-imut atatillugu iliuuserilikkanut aalajangikkanullu paasissutissiineq paatsuuganermik pilersitsinngitsoq aaqqissuulluagarlu pisariaqarluinnarpoq, IMAK-imi siulittaasoq oqarpoq naggasiillunilu:
- Naggataatigut ilinniartitsisut nersorpakka unammillernarsinnaasumik inissisimanitsinni akisussaaqataalluarnerat, qujaffigerusullugillu pisussaaffinnik ataqqinnillutik assigiinngitsutigut naammassinninniartuarmata, Elna Heilmann oqarpoq. Taanna IMAK-imi novembarip qeqqani siulittaasunngorpoq.