Politikkikkut akuttunngitsumik oqaatsit tusarnersut anguniakkallu annertuut tikkuullugit oqalugiartoqartarpoq, qanoq annertutigisumik meeqqat atuarfiat pitsanngorsarusunneqarnersoq pillugu. Ataaserli tassaavoq tusaruminartunik politikkikkut saqqummiussisarneq allalu tassaalluni pissutsit piviusut meeqqat atuartut ilinniartitsisuisalu ullut tamaasa atugarisaat.

Ilinniartitsisut kattuffianni IMAK-imi siulittaasoq, Elna Heilmann atorfilittat peqatigalugit nunatsinni meeqqat atuarfii assigiinngitsut pulaarlugit ilaasortanilu paasiniaaffigalugit angalaqqammerpoq, angalanermilu paasisat tunngavigalugit mianersoqqussutit paatsuugassaanngitsut politikkikkut aalajangiisartunut apuuppai:

- Ilinniartitsisorpassuit sulinngiffeqartariaqartarput allaallu ilai allamik suliffissarsiortarput meeqqat atuarfianni uisakajaartitaanertik artulerlugu.

- Tamatuma qaavatigut ajoraluartumik eqimattakkaarluni tiimit, tiimit kursusinut atugassat allallu tiimit sulinerannut iluaqutaasussaagaluit annikillisaaffigerujussuarneqarnikuupput allaallu ilaat sinerissami sumi tamaani sumiiffippassuarni atorunnaarsinneqarnikuullutik, taamaalilluni aamma meeqqat atuartut immikkut pisariaqartitsisut atuartinneqarnerat annertuumik annikillinikuuvoq.

Meeqqat immikkut pisariaqartitsisut amerliartuinnarput 

Kommunit meeqqat atuarfiannik aqutseriaasiat pissutaalluni ilinniartitsisut piumaffigineqarnerat sakkortusiartuinnanngilaq aammali uippakajaarnermik annertuumik pilersitsisarpoq, allaallu tamanna ima annertutigilersinnaasarpoq ilinniartitsisut nukissaarullutik sulinngiffeqartariaqartarlutik, IMAK-ip siulittaasua, Elna Heilmann oqarpoq nangillunilu:

- Namminersorlutik Oqartussat kommunillu pimoorussamik iliuuseqartariaqalerput qulakkeerniartariaqalerpaallu meeqqat inuusuttullu, nunatta siunissaanik taagortakkagut, atuartinneqarnertik aqqutigalugu atugagarsornikkut, tapersersorneqarnikkut siunnersorneqarnikkullu pitsaasumik sulissunneqarnissaat, Elna Heilmann erseqqissaateqarpoq.

IMAK-ip tikeraarnerani aamma uppernarsarneqarpoq meeqqat immikkut pisariaqartitsisut amerligaluttuinnartut aammalu meeqqat atuarfianni aallartinneranni tamanna takussutissaqartoq. Siulittaasup assut tupigusuutigaa politikkikkut suleriarnermi meeqqat atuarfiat qimanneqareersimatillugu iliuuseqarnissaq salliunneqarmat, uffa meeqqat atualerlaat aallartinneranni siusissukkut iliuuseqarnissaq salliutissallugu pissusissamisoornerugaluartoq:

- Meeqqat atuarfimmi angusarissaassagunik, mikisuunerminniit iliuuseqartoqarneratigut tapersersorneqartussaapput, Elna Heimann tikkuaavoq.

Isumaginninnikkut suliassarpassuit atuagarsornermullu piffissaq sivikilliartuinnartoq

Elna Heilmann tikkuaavoq namminersorlutik oqartussat kommunillu meeqqat atuarfiannut immikkut iliuuseqarnissamik piumaffiginninnerat annertusigaluttuinnartoq.

- Taarsiullugu meeqqat atuarfiinut toqqaannaq aningaasaliinerunngitsut suliniuterpassuit Naalakkersuisoqarfinnit, Aqutsisoqarfinnit allaniillu meeqqat atuarfiinut milorujussuunneqarput; socialemut tunngasut, pinaveersaartitsinermut, peqqinnermut tunngasut, Kalaallit Meerartaannit suliniutit, Unicef-imeersut suliniutit arlallit il.il. Tamakkualu qulaaniit naalakkiutitut isaanneqakkajupput ilinniartitsisut atuartitsinissamut pilersaarutigeriigaannik allanguinermik pinngitsoornerannilluunnit kinguneqartartumik.

Kommunit aningaasarliornerat atuarfimmut tuttarpoq

Elna Heilmann isumaqarpoq annertuumik malunnaatilimmillu iliuuseqartoqartariaqartoq meeqqat atuarfiat meeqqat atuarfiattut atuuttussaalluni ingerlanneqarnissaatut siunertat malillugit, tassalu meeqqat atuagarsornikkut piginnaasatigullu ingerlaqqinnissaannut sakkussaannik tuniorarluarnissaat anguniarlugu. Taamaattorli meeqqat atuarfiat tulleriaarinermi ullumikkutut allinngortinneqartuartillugu, meeqqat pillugit aammalumi ilaasortani, ilinniartitsisut pillugit sakkortuumik ernummateqarpoq:

- Ukiuni kingullerni kommunini aningaasatigut inissisimalluannginnerisa kingunerisaanik meeqqat atuarfiini sipaarniarneq atuartunut ilinniartitsisunullu kalluaasorujussuanngortoq malugivarput takusinnaallugulu. Kommunini ilinniartitsisut atuartitsinermi tiimit atortagaat minnerpaaffissaaniitinneqarput, ilinniartitsisut qaangiuttoorlutik atuartitsisinnaaneri minnerpaaffissaaniitinneqarput, taarsiullugu ilinniartitsisutut ilinniarsimanngitsunik tiimit atuartitsiviusussat matussuserneqartarlutik. Paasiuminaatsipparpullu taamatut aqutsinermi pingaarnersiuineq sutigut iluaqutaassanersoq? Taamatullu aqutseriaaseqarnerup takutimmagu, atuartitsinermi pitsaassutsip tunulliunneqarnera.

Ilinniartitsisut suliaqaqatigiittut atuagassiaat "Ilinniartitsisoq" kingulleq UANI atuarneqarsinnaavoq.