IMAK sakkortuumik isornartorsiuisoq: Nalunaarusiaq kusassarsimavaat
Ilinniartitaaneq pillugu ukiuni marlunni suliniutigineqartoq, nalunaarusiamik ilinniartitaanerup aaqqissuuteqqinneqarnissaanut inassuteqaatitalimmik inerneqarsimavoq. Susassaqartulli amerlanerit naammaginartumik tusaaniarneqarsimasorinngillat.
Ilinniartitsisut Kattuffiat IMAK, ilinniartitaanerup aaqqissuuteqqinneqarnissaanut suleqatigiissitat suliamik aallartitsimmata isumasiorneqarsimanngilaq.
- Suliniut aallartinneqalersoq tusarsimanngilarput. 2018-imi januaarip qaammataani siulittaasunngorama, IMAK-imi siulittaasuusimasoq Nuummukarpoq, atuarfimmi pisortanngorsimagami taamaalillunilu suliamut ilaatinneqalersimalluni. Tassani tusarpara suliniut aallartinneqarsimasoq, IMAK-ip siulersuisuini siulittaasoq Birthe Therikildsen Sermitsiaq.AG-mut oqarpoq.
Kusassakkamik suleqatigiinneraaneq
Tamatuma kingorna susoqarnersoq paasiniarlugu Namminersorlutik Oqartussanut allagaqarsimavoq, piumasaralugulu IMAK-ip peqataatinneqarnissaa.
- Siullermik itigartinneqarpugut, peqataatinneqarnissarpulli uteriiserfigisimavarput. Tamatuma malitsigisaanik malinnaatitassat pilersinneqarput, tassa teqeqqumut ingilluta suleqatigiissitat suliallilluunniit allat isummatsinnik tusarniaanissaannut utaqqisinneqarluta, siulittaasoq oqarpoq.
Siulittaasoq isumaqarpoq, suliamut qanoq peqataatinneqarsimatiginertik nalunaarusiami kusassarlugu takutinneqartoq.
- Nalunaarusiaq naapertorlugu suliap ingerlanneqarnera tamaat peqataatinneqarsimavugut, sanianili issiaannarsimavugut ilanngussaqarnissamut periarfissaqartinneqarata, taanna oqarpoq.
Nalunaarusiaq tigussaasunik imaqanngitsoq
Siulittaasup ingerlatsinermik sakkortuumik isornartorsiuinermi saniatigut pappialarsortoqarnerulernissaaanik suliaqartoqarnera pakatsissutigaa.
- Pakatseqqavunga, assorsuaq pakatseqqavunga. Isumaqaraluarama suleqatigiissitat tigussaasunik siunnersuueqassasut, pappialarpassuit siunnersuutinik tigussaasunik imaqanngitsut kisiisa suliarisimavaat. Pisariaqartitarput tassaavoq, oqaatigisat pappialamut allanneqarsimasut malitseqartillugit iliuuseqartoqarnissaa, ajoraluartumilli piffissami qaninnermi tamanna pisinnaarpasinngilaq, taanna oqarpoq.
Birthe Møller Therkildsen isumaqarpoq, maanna suliniutigineqartup ajornartorsiutaasartut iliuuseqarfiginagit ilinniartitsisunut ingerlateqqiinnassagai
- Tamanna ajuusaarnarpoq, paasiuminaalluni uagutsinnullu ulluinnarni meeqqat atuarfiannik ingerlatsiniarsarisunut asissuinerulluni. Siunnersuutinik atorneqarsinnaasunik tunniussisoqarnissaanut piffissaq sivisooq ingerlatillugu, ilinniartitaanerup iluarsiiffiginiarneqarnera ajornarsiartuinnassaaq, Birthe Therkildsen naggasiivoq.