Imak nutaamik siulittaasortaassaaq
Ilinniartitsisut Meeqqat Atuarfianneersut Kattuffianni, Imak-imi, sinniisoqarfik sapaatip akunnerata matuma naanerani ataatsimiippoq kattuffiullu siulittaasuanik nutaamik qinersilluni.
Maniitsumeersoq Elna Heilmann Ilinniartitsisut Meeqqat Atuarfianneersut Kattuffianni ukiumit nutaamit kattuffimmi siulittaasunngussaaq.
Kattuffiup ataatsimiinnerani siulittaasutut toqqarneqarpoq. Taamaasilluni kattuffimmi Birthe Therkildsen siulittaasuujunnaassaaq. Imak tusagassiutinut nalunaarpoq.
Sassartut sisamat
Arnat sisamat siulittaasussatut sassarput. Ukiuni sisamani kingullerni siulittaasoq, Birthe Therkildsen, maanna siulittaasutut qinerneqartoq Elna Heilmann, Monica Dorph kiisalu Dorthe Bidstrup. Marloriarluni taasititsereernermi taanikinnerpaat siulittaasutut qineqqusaartut allattorsimaffiannit peerneqarput, pingajussaanillu taasineq Elna Heilmannip taaneqarluarneranik kinguneqarpoq, ilisimatitsissutigineqarpoq.
- Tatiginninnissinnut qujanarujussuaq. Suleqatigiinnissarput qilanaaraara. Qineqqusaartut sinnerinut pingasunut qujanaq, minnerunngitsumik Birthe Therkildsenimut siulittaasuunermini sinnerluta sorsuuteqarsimaneranut. Sulineq nangissavara inuiaqatigiinni oqallinnermi ersarissumik tusaaneqarsinnaasumillu oqalliseqataanikkut, Elna Heilmann qinerneqareerluni oqarpoq.
Ukiup naanissaanut siulittaasuussaaq
Ukiup naanissaanut IMAK-imi siulittaasoq, Birthe Therkildsen Imak-imik ukiuni sisamani siulersuisinnaasimanini qutsatigaa.
- Sulinissinni angusaqarluarumaarnissarsi neriuutigaara sulilluarsimanissinnullu qujanaq, Birthe Therkildsen ataatsimiinnerup naammassineri oqarpoq.