meeqqat atuarfiat
Imak: Kommunit meeqqat atuarfiinik kivitsisinnaanngillat
Ilinniartitsisut kattuffiata, Imak-ip, kommunimit meeqqat atuarfinnit kivitsisinnaanerat qularaa. - Massakkut Imak-ip kissaatigineruaa atuarfeqarfik Namminersorlutik Oqartussanit tigoqqinneqassasoq, Imak allappoq
Sermitsiap tallimanngormat allaaserisaatut atuartut meeqqat atuarfiannit soraarummeernerminni angusinngitsoorlutik Fx-imik F-imilluunniit (karakteritoqqani 00-p 03-illu nalinginik) angusisut amerlasoorujussuupput.
Kisitsinermilu angusat aamma pitsaasorsuunngillat. Tamanna atuarfiit tamarmik 2014-imut kisitsisinik Inerisaavimmut nalunaarutigisaanni takuneqarsinnaavoq.
Maannalu ilinniartitsisut kattuffiannit Imak-imit kommunit meeqqat atuarfiannik kivitsisinnaanersut qularutigineqalerpoq.
- Inaarutaasumik misilitsinnermi angusat naammaginanngillat. Ilinniartitsisunik allamiut oqaasiinik ilinniartitsisinnaasunik amigaateqarpugut, sualummik qallunaat tuluillu oqaasii eqqarsaatigalugit. Aammattaaq amigaatigaavut matematikkimi fysikkimilu ilinniartitsisut. Atuartut tiiminik naammattunik atuartinneqartariaqarput anguniagassatut aalajangersakkat naamassiniarunikkit.
Taama ilinniartitsisut kattuffianni Imak-imi siulittaasoq Sivso Dorph tusagassiuutinut nalunaaruteqarpoq qulequtsersimasaminik ‘Kommunit meeqqat atuarfiannik kivitsisinnaappat?’.
Atuaruk: Nivi Olsenip angusinngitsoortorpassuit quarsaarutigai
Qeqqani ilinniartitsisut pikkorissartanngitsut
Sivso Dorph nalunaaruteqarnera naapertorlugu kommunit ilinniartitsisut pikkorissarnissaannut ilinniaqqinnissaannullu annertuumik ikilileripput.
- Kommuneqarfik Sermersuumi atuarfinni angisuuni tamani ilinniartitsisut agguagassarisassavaat 1784 tiimit pikkorissarnissamut ilinniaqqinnissamullu. Tiimit ingerlaannaq nungunnikuupput. Qeqqata Kommuniani ilinniartitsisut ilinniaqqinnissaannut tiimit tamaasa peerpaat, Sivso Dorph allappoq.
Sivso Dorph aamma ilanngullugu oqaluttuaraa Qaasuitsup Kommuniata nunaqarfinni tamani tiimit atuartitsivissat ikinnerpaaffissaat 15 procentimik ikilerneqarsimasut.
- Tamatuma kingunerissavaa, assersuutigalugu klasseni minnerni atuaqatigiinni pingasuni tiimit atuartitsivissat 595 tiiminut apparneqarmata, naak atuarfimmut inatsimmi atuartut atuartinneqarnissaannut 700 tiimit minnerpaaffissatut aalajangersarneqarsimagaluartut. Tamanna akuersaarneqarsinnaanngilluinnarpoq, Sivso Dorph allappoq.
Imak: Ilinniaqqinneq aqqutissaavoq
Taamaattumik ilinniartitsisut kattuffianni siulittaasoq isumaqarpoq nunatsinni atuarfimmik ineriartortitsinissamut periarfissatuarput tassaasoq ullumikkut ilinniartitsisooreersut pikkorissaanikkut ilinniartitseqqiinikkullu piginnaasaasigut qaffassarnissaat, allamiut oqaasiinik matematikkimi fysikkimilu pitsaasumik qaffasissusilimmik atuartitsisinnaalersillugit.
- Kommunilli taakkununnga akissaqanngillat. Taamaattoqartillugu inuiaqatigiit kalaallit inaarutaasumik misilitsinnermi angusaaasartut qaffassarnissaat nilliaatigaat. Ikioqatigiinniarta. Ilinniartitsisunut pikkorissarnissamut ilinniaqqinnissamillu pisariaqartitat naammattut pissarsiarineqarniarlik, nunatsinni atuarfinni piginnaasat pisariaqartut pigilinniassavavut.
Sivso Dorph allappoq, imalu nangilluni:
- Imak-ip kommunit meeqqat atuarfiinik kivitsisinnaanera qularaa. Massakkutut atuuttut atuutsillugit Imak-ip kissaatigineruaa atuarfeqarfik Namminersorlutik Oqartussanit tigoqqinneqassasoq.
Allaaserisaq ilaatigut atuaruk ‘Nivi Olsenip angusinngitsoortorpassuit quarsaarutigai' Sermitsiami nutaanerpaami saqqummersumi, ugguuna pisiarisinnaasarni: