Imaatigut sillimaniarnerup pingaaruteqassusaa politiinit erseqqissarneqarpoq
Innuttaasut imaatigut angalatillutik sillimaniarnissaat Kalaallit Nunaata Politiivinit kaammattuutigineqarpoq.
Innuttaasut umiatsiartillutik sillimiarnermik salliutitsinissaat Kalaallit Nunaata Politiivisa kaammattuutigaat.
Imaani navialisut politiinit suliaqaqataaffigineqartut sapaatip akunnerata naanerani arlaqarput. Soorlu imigassartorsimallutik umiatsiaaqqamik angalasut, imaatigut ujaasinerit aamma imaani ajunaartoq.
Kalaallit Nunaata Politiivi facebookimi quppernerminni imaatigut sillimaniarneq pillugu siunnersuuteqarlutik sapaatit akunneri kingulliit ukkatarinnissimapput.
- Imaatigut sillimaniarneq pillugu Facebookimi saqqummiussatsinni ilaatigut allassimavoq annanniutit aaqanngitsutut atisartakkat, umiatsiami ilaasunut naammattut umiatsiamiitinneqarnissaat inatsisaasoq. Umiatsiamik aquttup annanniutit naammattut nassarnissai akisussaaffigaa. Umiatsiamut ikigaangavit akisussaaqataalertartutit aamma erseqqissarneqarpoq. Immitsinnut imminullu paarissaagut - angalaartillutalu akisussaassusilimmik pissuseqassalluta, Kalaallit Nunaata Politiivini vicepolitiinspektør Sebastian Bach tusagassiorfinnut nalunaaruteqarluni oqarpoq.
Imaani ipisoq imigassartorsimallunilu umiatsiartoq
Arnaq 20-t sinnerlugit ukioqartoq sapaatiummat ullaassakkut umiatsiamik sukkasuuliamik Nuup eqqaani angalaartilluni ajutoortoqarneratigut ipivoq. Umiatsiami aquttut marluk imigassartorsimallutik umiatsiamik aqussimasutut politiinit pasitsaanneqarput. Umiatsiaq sukkasuumik ingerlaartillugu kassoq aqqusaarneqarmat ilaasut imaanut igeriunneqarsimapput. Pisumi angutit marluk piaarinani inuartarinnissimasutut, imigassartorsimallutik umiatsiamik aqussimasutut aamma piaarinani timikkut ajoqusiisimasutut unnerluunneqarput.
Politiit ilisimatitsipput Tasiilami umiatsiamik tillinniartoqarsimasoq imigassartorsimallunilu umiatsiartut marluk sapaatip akunnerata naanerani aamma naammattoorneqarsimasut.
- Imigassartorsimalluni umiatsiamik ingerlatsisut politiinit ukkatarilluarpagut suliatullu sakkortuutut isigalugit. Innuttaasut nalunaaruteqaraangata piaartumik qisuariartarpugut. Imaatigut isumannaatsumik sillimaniarnikkullu pitsaasumik angalanissaq pingaaruteqarpoq, taamaanngippat aquttumut ilaasunullu annertuumik kingunerluuteqarsinnaammat. Ukiut tamaasa ajoraluartumik - soorlu Nuummi suliaq assigalugu - pisut inuunerup annaaneranik timikkulluunniit ajoqusernermik kinguneqartut takusarpagut, Sebastian Bach oqarpoq.