Imaatigut kabelit aamma qaammataasat pilllugit eqqarsaqatigiit
Digitalitigut attaveqatigiinnerit inuiaqatigiinniit isumalluutaagaluttuinnarneri pillugu, Digitalinut Atortulersuutinut isumalioqatigiissitap internetimut sinaakkutit ukkanniarpai.
Imaatigut attaviit, qaammataasat radiokkullu maligaasat, aammalu Facebook Googlelu ulluinnarni saatassanut pingaaruteqartutut inissisimapput. Nunarsuarmilu sillimaniarnikkut inissisimaffik pissanganartoq digitalitigut atortulersuutit qanoq ninngutiginerinik ukkassilertitsivoq.
Sammisarpiaq ukkataralugu Ilisimatusarfimmi ilisimatooq Signe Ravn-Højgaard, isumalioqatigiissitamik pilersitseqataavoq.
Pasinartumik qamittoornerit
- Internet pingaarutilittut atortulersuutaanera pillugu, teknikip aningaasaqarnerullu tungaatigut internetikkut attaveqaqatigiinnermut sinaakkutit pillugit paasissutissiissutaareersumik tamanut ammasumik oqallittoqarnissaa pingaaruteqarpoq. Tamana pillugu Digitalinut Atortulersuutinut isumalioqatigiissitamik aallartitsivugut, sammisaq pillugu oqallinnerit ilisimatusarnikkullu ilisimasat nutaat pilersikkumallugit, tusagassiuutinut nalunaarummi Signe Ravn-Højgaard, oqarpoq.
Østersøenimi imaatigut attaviit pasinartumik kipitinneqarneri, Ukrainemi qaammataasanut atassuteqaatit isumaqatigiinngissutaaneri, aasarlu Tasiilami inuit nioqqutissanik pisiniarsinnaajunnaarnerinik kinguneqartumik internetip attaveerunnera ullutsinni internetip qanoq pingaaruteqartigineranut ilisimatuup assersuutitut taavai.
Nunat tamalaat akornanni teknologimik suliffeqarfissuit isumalluutaaneri, innuttaasunullu paasissutissat taama annertutigisut qanoq passunneqarnissaannik paasisimasat annikitsuuneri, Signe Ravn-Højgaardip ernumanartoqartippaa:
Nuna mikisoq teknologimillu suliffeqarfissuit
- Assersuutigalugu Facebookimut imaluunniit allaqatigiittarfinnut nammineerluni eqqarsarsinnaasunik robotilinnut iserutta, Amerikap teknologimik suliffeqarfissuinut paasissutissat annertuut nassiuttarpavut. Paasissutissat tamakku qanoq atorneqartarnersut aammalu ataasiakkaanut kalaallinullu inuiaqatigiinnut qanoq kinguneqassanersut amerlasuutigut paasiuminaattarpoq, Signe Ravn-Højgaard naqissusiivoq ilassuteqarlunilu:
- Kalaallit Nunaat taama mikitigitillugu teknologikkut pissaanillit kalaallinut inuiaqatigiinnut isumannaatsumik iliuuseqarnissaat qulakkeeruminaappoq. Kalaallit Nunaata inuisa amerlassusianiit Facebook sulisoqarneruvoq. Suliffeqarfissuuvoq, Kalaallit Nunaannik soqutiginninngilluinnarsinnaasoq.