Imaatigut kabelip ajortinnera: Iluarsaassineq sivisussaaq

Umiarsuaq avannaani kujataanilu imaatigut kebelimik iluarsartuussisussaq, Tele-Postip maanna pissarsiarisimalerpaa. Tamannali ikiortissap tikiliivinneranik isumaqanngilaq. Avannaani atuisut qaammatit marluk missaanni kittorartoorsimanermit sunniuteqarfigineqarnissaat, Tele-Postip nalilerpaa.

Aatsaat februaarip qeqqani umiarsuaq Canadamit aallarsinnaavoq, Avannaani ukiuunerani suliaqarsinnaanissamut piareersarneqaqqaassagami. Tamatuma kingorna kabelit kingoraartissat aallugit Nuummut aallassaaq.

Avannaani kabeli umiarsuup siulliullugu iluarsaatissavaa, tassani kittorartoornerup kinguneri atuisunit malugineqarmata.

- Imaatigut kabelip suliarineqarnera kinguaattuunginnissaa soorunami pingaartsipparput, atuisutta attaveqaatitik sukkasuut utertipallanniassammassuk, Tele-Postip pisortaanera Kristian Reinert Davidsen, tusagassiuutinut nalunaarummi allappoq.

Avannaani akikilliliiniartoq

Attaveqaatit ajoquteqarallartillugit Tele-Post nalinginnaasumik akiliutinik taarsiisussaatitaanngilaq.

Maannakkulli atuisunut avannaaniittunut pisoq Tele-Postip aqutsisuisa allarluinnartut nalilerpaat.

Taamaattumillu ajornartorsiuteqarneq tamaat akikilliliiffiussaaq.

Sisimiunit Upernavimmut atuisut tamarmik Tusass internet annermik 10/2 Mbit aamma 30/2 Mbit-mik sukkassusilinnik atuisuuffillik, Tusass internet minnerup 2/1 Mbit 499 koruunip nalinga akilertassavaat.

Nittartagaq paasissutissalik

Kujataani kittorartoornerup kingorna attaviit piaartumik nuunneqarput, taamaalillutik Island aqqutigalugu attaveqalerlutik, taamaammallu atuisut kittorartoorneq malugiunnaarpaat. Avannaani imaatigut kabeli iluarsaanneqareerpat, kujataani imaatigut kabeli iluarsaakkiartorneqassaaq.

Kujataani imaatigut kabelip ajoquteqarnera apriilip aallartinnerani iluarsineqassasoq, Tele-Postip naatsorsutigaa.

Tele-Post maanna nittartakkamik immikkut ittumik pilersitsivoq, taamaalilluni imaatigut kabelip iluarsaanneqarneranut malinnaanissamut soqutiginnittut malinnaasinnaapput.