attaveqarneq
Imaatigut kabelimut isumaqatigiissut Knud Kristiansenip qiimmatsaatigigaa
Imaatigut kabelip avannamut tallineqarnera annertuumik sunniuteqassaaq, attaveqarnermut naalakkersuisoq ilaatigut taama oqarpoq
Sisamanngornermi Tele-Postip suliffeqarfimmik Nokiamit pigineqartumik Alcatel-Lucent Submarine Networksimik isumaqatigiissut atsiorpaa, taanna Nuummiit Maniitsoq aamma Sisimiut aqqusaarlugit suliffeqarfiup imaatigut kabelimik sanaartorlunilu pilersitsinissamik akisussaassaaq.
Ineqarnermut, sanaartornermut attaveqarnermullu naalakkersuisup, Knud Kristiansenip (A), imaatigut kabelip tallineqarnissaa qiimmatsaatigaa.
Atuaruk: Aasiannut imaatigut kabeli pillugu isumaqatigiissut maanna atsiorneqarpoq
Ineriartorneq annertooq naatsorsuutigigaa
- Attaveqaatit digitaliusut ingerlalluartut ineriartortitsinissamut, aammalu nunatsinni isorartoorsuarmi innuttaasut suliffeqarfiillu ataqatigiinnissaannut pingaaruteqarput, taanna tusagassiuutinut nalunaarummi allappoq.
Nuummiit Qaqortumut immap naqqatigut kabeli maanna atortoq nalunaarasuartaatitigut attaveqaqatigiinnermik atuinerup annertuserujussuarneranut pisooqataavoq. Immap naqqatigut kabeli nutaap, illoqarfiit Maniitsoq aamma Sisimiut aqqusaarlugit Aasiannut apuuttussap 2017-imi atorneqalernera assinganik sunniuteqassasoq Knud Kristiansenip naatsorsuutigaa.
Atuaruk: Immakkut attaveqqaat avannamut ilaneqalerpoq
Pilersaarutit allat
- Taamaattumik nalunaarasuartaateqarnermi attaveqaatinut aningaasaliisarnerit pingaaruteqarput, nunalu tamakkerlugu nuannaarutaallutik, Knud Kristiansen oqarpoq.
Kiisalu Aasianniit Ilulissanut radiokædemik sukkasuumik pilersitsinissaq, aammalu radiokædep maanna atorneqartup Uummannamiit Upernavimmut tallineqarnissaa pilersaarutigineqarpoq.
Aningaasaliinermi innuttaasut 20.000-it missaanniittut nalunaarasuartaatitigut attaveqaqatigiinnerup atorneqarnerani pitsannguiffigineqassapput.