Imaani uumasunik illersuineq: Partii Naleqqap kangerlunni aalajangersimasuni angallatit angalaqqusaajunnaartinniarpai
Jens Napaattuup (PN) qilalukkat qernertat qaqortallu kangerlunni sivisunerusumik najortagaanni nipinut illersorniarlugit, umiarsuit takornarniartaatit angallatillu allat takornariartitsisartut kangerlunnut pineqartunut pulasarnissaat inerteqqutinngortikkusuppaa. Naalakkersuisut siunnersuummut itigartitsipput, allannguutissatulli siunnersuuteqarlutik.
Inatsisartuni ilaasortap Jens Napaattuup imaani uumasut angallatit nipiliortarnerannit sunnerneqartarnerat ernummatigaa.
Taamaammat aalajangiiffigisassatut siunnersuutigisimavaa, Qilalukkat nipinut illersorneqarnissaat siunertaralugu kangerlunni qaqortat qernertallu sivisunerusumik najortagaanni angallatit aalajangersimasut ingerlaartarnerisa killilerneqarsinnaaneranut periarfissat misissoqqullugit Naalakkersuisut peqquneqarnissaat.
Arferit najortagaanni takornariaqartassanngitsoq
Taamaammat piumasaraa, angallatit aalajangersimasut, soorlu umiarsuit takornarniartaatit angallatillu allat takornariartitsisartut kangerlunni qilalukkat qernertat qaqortallu sivisunerusumik najortgaanni angalanissaannut inerteqquteqartoqalernissaa, tassa qilalukkat nipinut illersorniarlugit.
- Tamatumani assersuutigalugit eqqarsaatigaakka Tunumi Kangerlussuaq Qaanaallu kangerlussua, taakkualu saniatigut aamma allanik kangerloqarsinnaalluni pulaffigeqqusaajunnaartariaqartunik, taanna siunnersuummini allappoq.
Jens Napaattuup oqaatigaa, ilisimatusartut misissuinerminni takusinnaasimagaat issittumi qernertat sikusiummit 70 kilometer tikillugu ungasitsigigaluartut sikusiutip nipaanit qimaatinneqartartut, soorlu aamma qaqortat nipiliorfinnit nigortitertut takuneqartarsimasoq.
- Isumaqarpugut uumasut najugaqartut neqissaqarniarnerannut pingaarutillit illersorneqarnissaat siuarsarniarlugu pisariaqartunik iliuuseqarnissaq pingaaruteqartoq, Partii Naleqqami politikkerit oqarpoq.
Naalakkersuisut allannguutissatut siunnersuuteqartut
Naalakkersuisut siunnersuummut itigartitsivinngillat, nutaamilli nalunaarusiornissaq kissaatiginagu.
Tassunga paarlaallugu siunnersuutigineqarpoq, kommunit tassunga attuumassutillit, biologinik aamma najukkani aalisartunik piniartunillu Naalakkersuisut suleqateqarlutik maannangaaq qilalukkat qernertat umiarsuit nipiliornerinut illersorneqarnissaannut suliniutissanik aallartitsissasut.
Naalakkersuisut allannguutissatut siunnersuutigaat:
- Naalakkersuisut nalunaarummik, qilalukkat nipiliornermut illersorneqarnissaat siunertaralugu angallatit aalajangersimasut kangerlunni, qilalukkat qernertat aasaanerani sivisunerusumik najortagaanni angalasarnerinut maleruagassiuiffiusumik suliaqarnissamut peqquneqassasut.