Ilungersuussisoq Esbjergimi isikkamik arsaannermik nuannaartitsisoq

Suna tamarmi ajornakusoortinneqartariaqanngilaq. 46-nik ukiulik Anton Nielsen Esbjergimi isikkamik arsaateqataanissamut peqataarusuttoqarnersoq aasaq Facebookikkut apeqqutigaa.

Piumasoqarsimavoq.

Maanna peqatigiiffimmi 16-it ilaasortaapput. FC Polar periarfissaqartillugu unammisarpoq. Peqatigiiffik aallarterlaaq soorunami sungiusarfissaaleqisarpoq. Timersortarfimmi piffissamik pissarsinissaq imaluunniit silami isikkamik arsaattarfimmik atornissaq ajornaatsuinnaanngilaq.

Peqatigiiffik Esbjerg Kommunemit akuerineqarpat 46-inik ukiullip Anton Nielsenip Uummannaminngaanneersup peqatigiiffiup sungiusarfigisinnaasaanik pissarsinissap ajornannginnerulernissaa neriuutigaa. Suliaq ingerlanneqarpoq.

Naammassineqarnissaata tungaanut peqatigiiffiup akeqqamik arsaattarfianniittariaqarput.

Inuuniarneq ilungersunartoq

Anthon Nielsenip Sermitsiaq.AG decembarip aallartilaarnerani oqaloqatiginerani isertuutinngilaa inuuniarnini ilungersunarsimammat.

- Marloriarlunga nakkaqqanikuuvunga. Inuttut misigisaqapilunnerma kingorna 2004-imi Kalaallit Nunaanniit aallarpunga. Suna tamarmi soqutaajunnaarsimavoq, allarpassuillu assigalugit misigissutsikka eqqarsaatikkalu imigassamik hashimillu matoortarpakka. Taamaallunga qaqivunga. Arnamik inequnartumik naapitsivunga aappariilerlutalu sunalu tamarmik nuannersutut isikkoqaleqqippoq. Inuunera nuannerseqqippoq. Biilimik ajutoorujussuarneq taassuma toqqutigaa, nakkaqqerujussuarlungalu. Tassani imigassamik hashimillu annertuumik atornerlueqqilerpunga, Anthon Nielsen ammasumik unneqqarilluni oqaluttuarpoq.

- Qujanartumik ajorunnaaqqissimavunga. Sdr. Ommemi nuliaralu meeqqagullu marluk illumi uiguleriiaani najugaqarpugut. Nuliara inuusuttuaraallu aapparinikuusimavara. Maanna ima nukissaqartigaanga nunaqqatinnik pisariaqartitsisunik ikiuerusussuseqarlunga. FC Polarilu ikiullunga atorluarsinnaavara, Anthon Nielsen tulluusimaaqaluni nuannaarluni oqaluttuarpoq.

Aqqusaangapassualik

FC Polarimi unammeqataasartut arlallit aqqusaangarpassuaqarsimapput. Unammisartulli nuannaaqalutik unammileraangata taamaattoqarneranik malunnartoqarneq ajorpoq. Taakku isikkamik arsaattartorpassuit allat assigilertarpaat. Odensemi Kalaallit Illuat aamma ikiorsiilaarsimavoq.

Sermitsiaq.AG-p pulaarnerani peqatigiiffik Esbjergimi timersortarfimmi sisamariarluni unammivoq. Unammisartut ataasiinnarmik taleqaraluarpata illuinnaaniluunniit iseqaraluarpata apeqqutaatinneq ajorpaat. Tamatigut unammillertoqartarpoq. Isertitsinerit tamarmik assut nuannaarutigineqartarput.

Siunissami sinnattut

- Amerlanerusunik ilaasortaqalernissarput soqutigilluinnarparput. Esbjergimi najugaqanngikkaluaruilluunniit FC Polarimi ilaasortaasinnaavutit. Vejleminngaanneersumik ilaasortaqarpugut taanna periarfissaqartilluni sungiusaqataajortortarpoq, FC Polarimi siulittaasoq oqaluttuarpoq.

- Neriuutigaara aasamut silami unammisalernissarput, neriuutimalu ilagaat siunissami aasaanerani peqatigiiffik kalaallinik unammisartuutillik unammiuaarfigisinnaasaannik pilersitsisinnaanissaq, Anthon Nielsen naggasiivoq.

Anthon Nielsen nissumi illuani taqqaminik milittoorsimanini pissutigalugu siusinaartumik sulisinnaajunnaarnersiuteqarpoq unamminiartillunilu nipaallisaatitortarluni.