Skip to main content

Ilungersunartut ingerlaqqipput: Issittumi aallartitaq pillugu suli aaqqiissuteqartoqanngitsoq

Kunngeqarfimmut Issittumi aallartitatut atorfik suli aaqqiissuteqarfigineqanngilaq. Aallartitatut toqqarneqartoq taarsiullugu allaffimmi pisortatut atorfinissimanerarneqarpoq, kisianni nunanut allanut tunngasunut ministereqarfiup tamanna uppernarsarumanngilaa.

Kunngeqarfiup Issittumi aallartitaa kalaaliussanersoq aamma Kalaallit Nunaanni imaluunniit Danmarkimit immikkut inuiaassueqarneq imaluunniit suminngaanneernera eqqarsaatigalugu toqqarneqassanersoq pillugu suli isumaqatigiinnginnermut aaqqiissuteqartoqanngilaq.

Tusagassiortup atuakkiortorlu Martin Breumip oqarnera naapertorlugu, Tobias Elling Rehfeld, Danmarkimit issittumi aallartitatut ukioq manna siusinnerusukkut toqqarneqartoq, allaffimmi pisortatut taarsiullugu atorfinitsinneqarsimavoq. KNR taama allaaserisaqarpoq.

Nunanut allanut ministereqarfik maannakkorpiaq Martin Breumip oqaaseqarnerinut oqaaseqarumanngilaq, issittumilu aallartitamik atorfimmut saqitsaattoqarneranut aaqqiissummik naammaginartumik nassaarniarneq sulissutigineqartoq ilisimatitsissutigineqarpoq.

- Juunimi Nunanut Allanut, Sillimaniarnermut Illersornissamullu politikkimi Attaveqaqatigiinnermut ataatsimiititaliap Nuummi ataatsimiinneranit nalunaarummi aalajangiunneqarpoq ”Naalakkersuisut aamma Danmarkimi naalakkersuisut issittumi aallartitatut atorfik pillugu oqaloqatigiinneq nangissagaat”. Oqaloqatigiinneq taanna suli ingerlavoq, allagaqarluni akissummi tamanna oqaatigineqarpoq.

Attaveqaqatigiinnermut ataatsimiititaliami aaqqiisoqanngitsoq

Issittumi aallartitatut atorfik pillugu oqallinnermi aallartitaq kalaaliussanersoq imaluunniit kalaaliussannginnersoq oqallisigineqarpoq. Kalaallit politikerit arlallit Kunngeqarfiup Issittumi soqutigisai sinniisuuffigilluarumallugit, aallartitap issittumi aamma Kalaallit Nunaanni pissutsinut paasisimasaqarluarnissaanik piumasaqarput. Nunanut allanut ministerip Lars Løkke Rasmussenip, atorfinitsitsinerit inuiaassusermik tunngavilerneqartassanngitsut arlaleriarluni oqaatigaa.

Tobias Elling Rehfeldip Afrikami Kujallermi aallartitatut atorfimmeersumik toqqaaneq, Naalakkersuisut siulittaasuata Múte B. Egedep Kalaallit Nunaannit peqqusaarnertut oqaatiginikuuaa.

Attaveqaqatigiinnermut ataatsimiititaliami juunimi ataatsimiinneq suliamik aaqqiiffiusinnaasutut isigineqaraluartoq, inaarutaasumik nalunaarummi sammisaq pillugu annerusumik oqaaseqartoqanngilaq.

Issittumi Siunnersuisoqatigiinni siulittaasuunermi pingaarutilimmik akisussaaffeqartoq

Nasiffimmi – Nunanut Allanut Sillimaniarnermullu Ilisimatusarfimmi aamma Københavnimi Forsvarsakademietimi ilisimatusartup Jeppe Strandsbjergip maluginngitsoorneqarsinnaannginnerarpaa, pingaartumik Kalaallit Nunaat apeqqut pillugu ilungersuuteqarmat.

Inaarutaasumik nalunaarummi Kalaallit Nunaat Issittumi Siunnersuisoqatigiit ataatsimiinnerini Savalimmiut aamma Danmark sioqqullugit oqaaseqartitsisarnissaanik nassuiaaneq, Kunngeqarfiup siunnersuisoqatigiinni siulittaasuuffik maajimi 2025-mi tiguppagu ”immikkut malunnaateqassaaq”. Tamanna assersuutigalugu ministerit ataatsimiinnerinik, Nuummi pisunik, imaluunniit allatut Kalaallit Nunaata siulittaasuutitaqarnermi salliunissaanik kinguneqarsinnaavoq.

Issittumi aallartitaqarneq pillugu aaqqiagiinngissuteqarneq qanoq iluarsineqassanersoq suli erseqqissarneqanngilaq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER